Tecrîdê vera Rayberê Şarê Kurdî Abdullah Ocalanî dewam keno. Rîxmê pêro xîretanê avûkatan muracatê pêvînayîşî red benê. Tewr peynî 2ê adare de Abdullah Ocalanî birayê xo Mehmet Ocalanî reyde pêvînayîş kerd.Wekîlê HDPyî yê Riha Omer Ocalanî tecrîdê vera Rayberê Şarê Kurdî Abdullah Ocalanî , polîtîkaya îqtîdarî ya koçberan û Sûrîye  ANFyî rê ercnayî.

 Omer Ocalanî vat: ''Şewatê Îmraliyî ra dima şarê kurdî nêrazîbîyayîşê xo mojna. Naye ra Birêz Ocalanî reyde pêvînayîş ame kerdene. Heyf ke nêzdîbîyayîşê dewleta tirke yê bi Birêz Ocalanî tim stratejîk o. Ge ge bi serran tecrîd kena  ge ge zî neçare manena ke destûr bida pêvînayîşan.Birêz Ocalan seba dîyalogan amade yo. Ocalan 21 serr ê ke seba çarserîya meseleya kurdî têkoşîn keno. Rewşa Tirkîya nika zaf xirab a. Seba ke Tirkîya na rewşe ra bixelisa ganî adres bivurna. Adres Moskova yan zî Washington nîyo. Adresê çareserîye Birêz Ocalan o.

Rûsya pare kerd ke îşxalê vera Rojawanî de bi hezaran kurdî newçare mendî ke koç bikerê. Dewleta tirke seba ke Sûrîye de verê kurdan bigêra şerê Îdlîbî kerd xorin. Pêro cergî Tirkîya ser o derbazê Sûrîye bîyî û 7-8 serran ra nata uca de qirkerdişî kenê. Bi hezaran kesî ameyî qetilkerdene. Pareyê Tirkîya zî nê qirkerdişan de esto. Kurdî ganî yewîye û îtîfaqê xo bihêzêr bikerê.Dewleta tirke vera koçberan polîtîkayêka gemarine kena. Seba menfaatê xo vera Ewropa koçberan xebitnena. Tirkîya bi zanayîşî na polîtîka ana ca.Hesabê dewleta tirke Îdlîb de nêameyî ca. Coka vera Ewropa koçberan xebitnena. Bi hawayêkê eşkerayî qeçaxîya merdiman kena.''