Nufusê Agirî 540 hezar o la şaristan de krîzê weşîye beno pîl. Şaristan de bi qîmî nêweşxane, merkezê weşîye, doktor, kedkarê weşîye û cîhazê weşîye çin ê. 

Wekîla Partîya Çep a Keske ya Agirî Necla Demîr da zanayene ke goreyê doneyanê Wezîrîya Weşîye 461 kesan rê yew doktor/e keweno/a la Agirî de 857 kesan ra doktorêk/e keweno/a.

Necla Demîr vist vîrî ke Agirî de ê şaristanan ra yew o ke tede weledîyayîş zaf o û vat: ''La merkezê Agirî de hûmara doktoranê nêweşîyanê cinîyan herinda ke 12 biba 5 a û şaristan de teyna yew onkolog est o. Nêweşî neçare manenê ke şorê Erzirom yan zî Wanî. Na meseleya Agirî bi serran o dewam kena. 

Rayîrê mabênê Erzirom-Agirî nêweşan rê bîyo travma. Nêweşî rayîr de dinyaya xo bedilnenê. Wexto ke ma na babete selahîyetdaran rê vate na mesele sey qederê ma nîşan kerde. Ganî na mesele ser o ma vinderê. Ma do çîyê hewceyî bikerê.''