Nufusê Agirî 550 hezar o û nînan ra tewr tay 300 hezar kesî weçînitox ê. HDPyî weçînayîşanê 2018î de Agirî de 3 wekîlîyî vistbî destî. Partîya Çep a Keske zî armanc kena ke şaristan de 4 wekîlîyan bivisna destî. 

Îdarekarê HDPyî yê qezaya Bazîdî Suat Yîgîtî derheqê xebatanê weçînayîşî de ANFyî rê qisey kerd. 

Suat Yîgîtî pare kerd ke nêzdîbîyayîşê şarî seba înan moralêko pîl o û vat: ''Her dewe de coşêko pîl est o. Mîsal wexto ke ma şinê tax û dewêke seba ke alan darde bikerê şar hetkarîya ma keno. No zî mojneno ke şar bi Partîya Çep a Keske wazeno îqtîdarê AKP-MHPyî ra bixeliso. Cinî û ciwanê Agirî hol zanenê ke ganî cewabêkê xurtî bidê xîretanê binpaykerdişê heqan ê îqtîdarî.''

Suat Yîgîtî îfade kerd ke qîrayîşê serkewtişî yê meydananê Agirî mojnenê ke ê do 4 wekîlan bişawê Meclîsî. Yîgîtî vat: ''Êyê ke estbîyayîşê kurdan înkar kenê û çin kenê, tecrîdî ancê ca û zîndanan kenê îşkencexaneyan şarê Agirî 14ê gulane de cewabêkê xurtî do bido înan û çar wekîlîyan bivisno destî. Şarê Agirî qerardar o. Ne medyaya îqtîdarî ne zî dek û dolabê înan do nêeşkê înan bixelisnê. Ez venga şarê ma dana ke wa şoro sindoqan ser. Weçînayîşan rê tay mend. Ma pê pêro hêzê xo xebitîyenê. Seba serkewtişê weçînayîşî ma seferber bê.''