Qanûnê înfazî yo newe 15ê temmuza 2023yî de kewt dewre. La çarçewa nê qanûnî tepişteyanê sîyasîyan nêgêno xo sereyî. Tepişteyê sîyasîyî bi madeya 'sûcê terorî û xebatê rêxistinîye teberê nê qanûnî de yê' raşta raşte maruzê cîyakerîye bîyî. Hetê bînî ra no qanûn tepişteyanê sîyasîyan ra ber seba tepişteyanê bînan efû zî beno ke xo de bîyaro.

Wekîlê Partîya Çep a Keske yê Amedî û Endamê Komîsyonê Heqanê Merdiman ê Meclîsî Serhat Erenî derheqê qanûnê înfazî yê neweyî de ANFyî rê qisey kerd.

Erenî vist vîrî ke qanûno newe verî ke bêro nîqaşkerdene şewa 7ê temmuze de nişka ra Meclîs de ameyo qebulkerdene. Erenî vat ke Partîya Çep a Keske waşt ke madeya 'sûcê terorî û xebatê rêxistinîye teberê nê qanûnî de yê' nê qanûnî ra bêra vetene la no nêameyo qebulkerdene.

Erenî vat: ''AKPyî senî ke waranê sanayî û bazirganîye de terefgîrê xo awan kerdî, afernayî; warê sûcan de zî terefgîrê xo afernayî. Ma zanenê ke Tirkîya bazirganîya madeyanê kundoxî de hînî merkez a û hêzê asayîşî zî parçeyê na bazirganîye yê. Reyna ma vînenê ke AKP pê qanûnan, qiseyan û polîtîkayanê xo rayîr dano şîdetê vera cinîyan, hêrişanê cînsîyan û kişîyayîşê cinî û domanan. Îqtîdarê AKP-MHPyî tim sûcdaran paweno, mafya zî seba ke gemarîya xo binimna şuxilneno. Xora serçeteyî şinê lew nanê destê Bahçelîyî ro. Yanî qanûnê înfazî yo newe seba nê kesan o. AKP-MHP weçînayîşanê herêmîyan de ney sey hacetî bişuxilno. Nê çete û mafyayî prosesê weçînayîşan de do paştî bidê îqtîdarî.

Hetê bînî ra qanûnê înfazî yo newe dûştê krîterê têdûştî, edalet û heqan o. AKP-MHP reyna dişmenîya vera kurdan û HDPyî ser o kampanyaya weçînayîşî keno. A raşte îqtîdarê AKP-MHPyî HDPyî xo rê sey gefî vîneno. No qanûnê înfazî zî dişmenîya îqtîdarî ya vera kurdan eşkera keno. Tepişteyê sîyasîyî azadîya xo ra dûrî yenê vistene û verê înan de dişmenîye yena kerdene. Kiştoxî, tecawuzkerî û çeteyî xêrê nê qanûnî ra do bivejîyê teber. Îqtîdar bi nê hawayî nê kesan paweno, xelate dano înan û sîyasîyan verê komelî de keno dişmen.''

Erenî bale ante ser ke hûmara Zîndanê bi Tîpê Syî û Zîndanê Bi Asayîşê Berzî zêdîyena û nê zîndanan de tecrîd yeno caardene. Erenî vat: ''Nê zîndanî seba tepişteyanê sîyasîyan virazîyenê. Vera tepişteyanê sîyasîyan hem şertê înfazî yenê girankerdene, hem heqê înan yenê xespkerdene hem zî ê yenê tecrîdkerdene. No zî yeno a mana ke mîyanê ceza de ceza dîyena tepişteyanê sîyasîyan. Îqtîdar bi nê hawayî hem komelî gêno binê kontrolê xo hem zî bi nê zîndanan tersneno.''