Seba paştdayîşê grevanê vêşanîye yê ke bi serkêşîya hemsereka KCD’yî Leyla Guvene hemverê tecrîdî de dest pêkerdîbî yenê viraştene, grûbêka aktîvîstanê Almanan zî dest bi grevê vêşanîye kerdibi.

Grevê vêşanîye yo ke Heinrichplatzî yê qezaya Kreuzbergî ya paytext Berlînî de yeno kerdene bi şîarê “Leyla; mücadeleye to û ti zerrîya ma de ya” yeno dewamkerdene. Çalaki roja hîrêyine de ya.

Vizêr bi hawayêkê girseyî serdana 6 çalakwananê grevê vêşanîye ame kerdene. Çalakwananê grevê vêşanîye kîşta grevî de mîyanê roje de derheqê tecrîdkerdişê Ocalanî de vilawekan kenê vila.

Sere de Kurdistanijî xeylî Tirkîyayij û Almanî şinê serdana çalakwanan. Tewr peynî vizêr grûbêka aktîvîstan ê Baskî serdana xeyme kerde. Aktîvîstanê Baskijan ard ziwan ke ê paştî danê waştişê aktîvîstanê Almanan ê seba qedînayîşê tecrîdî.

Hemsereka NAV-DEM’î ya Berlînî Nûjîyan Gunaye zî dimayê serdana çalakwanan ra eşkerayîyêk daye çapemenîye û veng da rayapêroyîye ya Almanan ke seba qedînayîşê tecrîdkerdişê Ocalanî bi mesuldarîye tê bigêrê.