Goreyê melumato ke ame girewtene, Umut Acarî roja 27ê êlule bajarê Ingostadî yê Almanya de xo veşnayo. Ame musayene ke Acarî seba ke tecrîd şermizar bikero, zîyaretê Erdoganî û paştîdayîşê hukmatê almanan yê rejîmê tirkî protesto bikero, nizdîyê keyeyê xo de xo veşnayo. Acar, serra 1990î de qezaya Hezo ya Êlihî de ameyo dinya.

Tevgerê Cinîyanê Kurdî yê Ewropa û Dîvanê Hemserekîye yê KCDK-Eye seba Acarî serweşîye waştî. Tevgerê Cinîyan dîyar kerdo înan bi hawayo xemgîn mergê ciwanî eşnawito û wina domnayo: “Ma sere de keyeyê Acarî û şarê Kurdîstanî rê serweşîye wazenî. Ma vernîya vîrardişê şehîdê xo de birêzdarî vindenî.”

MA DO WAYÎRÊ ŞEHÎDÊ XO BIVEJYÎ

Tevgerê Cinîyan vera zîyaretê Erdoganî yê Almanya de zî reaksîyon nîşan dayo û wina vato: “Nê destekî hîna zaf cesaret danî Erdoganî. Rayberê ma Abdullah Ocalan çalakîyanê winasîyan raşt nêvîneno. Ganî ciwanê ma hêzê xo beşdarê têkoşînê demokrasî bikerî. Ma do bi no hawa wayîrê şehîdê xo bivejyî.”

KCDK-Eye zî mesajê xo de bale anto tecrîd û destekê hukmatê almanan yê Erdoganî ser û wina vato. “Ganî hukmatê almanan û selahîyetdarî mana bidî na çalakîye. Wa bivînî ke sebrê kurdan nêmendo û ganî destek û cesaret nêdîyo Erdogano dîktator.”