Almanya de dîktatorîya Erdoganî yena protesto kerdene

Çalakîyê protestokerdişê Serekkomarê tirkî Erdoganî xeylê bajaranê Almanya de dest pêkerd.

Serokkomarê tirkî R.Tayyîp Erdogan 28ê aşme de do şiro Almanya. Semedê şermizarkerdişê Erdoganî çalakîyî yenî organîze kerdene.

Platformo ke bi desan dezgeyê kurd, alman û tirkî tede ca gênê, bi şîarê ‘Ti xeyr nêameyî Erdogan’ (Erdogan not welcome) çalakîyan organîze keno. Çalakîyê merkezî 28ê êlule saete 16.00 de Postdamerplatzê Berlînî de û 29ê êlule saete 11.00 de Deutzer Werftê Kolnî de do bêrî viraştene. Platformî waşt ke wa her kes vera dîktatorîya Erdoganî de vejîyo kuçeyan û vengê xo berz bikero.

Pero bîn ra hewteyêk o Almanya de bi çalakîyan polîtîkaya hêrişkarî ya Erdoganî û paştîgerîya hukmatê Almanya yenî şermezar kerdene.

Vizêr zî bajaranê Berlîn, Dusseldorf, Hamburg, Frankfurt, Hannover, Stuttgart, Bielefeld, Bremen, Essen Darmstad û Kasselî de çalakîyê protestokerdişê Erdoganî ame viraştene û çapemenîya almanan ci rê zaf eleqa nîşan da.

Çalakîyan de dîqet ancîya hêrişê hukmatê AKPyî yê vera kurdan de benî ser û ame vatene ke; Erdogan qetilkar o û Almanya bi nê dawetî sucanê ey rê bena şîrik. Çalakgeran dîyar kerd ke ê Erdoganî Almanya de nêwazenî û hukmatê almanan ra waşt ke wa na xeletî ra yew hele cuwa ver peyser agero.