Serdozgerê Pêroyî yê Federalî yê Almanya Peter Frankî mabênê 5-7ê temmuza 2022yî de Tirkîya zîyaret kerdbî. Franko ke vengdayîşê Serdozgerê Mehkemeya Berze Bekîr Şahînî ser o şibi Tirkîya, Erdogan, Serekê Mehkemeya Cezaya Girane Mehmet Akarca û Wezîrê Edaletî Bekîr Bozdagî zî tede bi selahîyetdaranê dewleta tirke xeylêk pêvînayîşî kerdbî.

Rixmo ke 10 rojî derbaz bîyê hema zî hukmatê Almanya derheqê nê pêvînayîşan de agahîyêke nêdaye. Wekîla Partîya Çepe Clara Bunger no zîyaret ard rojdemê Parlamentoyê Federalî û bi vernîyazêkê persan waşt ke hukmatê Almanya derheqê zîyaretê serdozgerî de eşkerayîyêke bido.

La hukmatê Federakî yê Olof Scholzî cewabê vernîyazî de tedeyîya zîyaretî eşkera nêkerde. Hukmatî dîyar kerd ke ê mecbûr nîyê ke tedeyîya pêvînayîşanê bi hemkaranê mîyanneteweyîyan eşkera bikerê.

Zîyaretê serdozgerê almanî hetê pawitoxanê heqanê merdiman ê Almanya ra zî bi hawayêkê xurtî ame rexnekerdene.

Hetê bînî ra çapemenîya nêzdîyê AKP-MHPyî wina nuşt ke Tirkîya Almanya ra 129 kesan wazena û lîsteya nê kesan daya Serdozger Frankî.