Dayîreyê Îdareyî yê Federalî agahîyanê derheqê komeleyanê kurdan, endam û îdarekaranê înan ê Almanya 1994 ra nata dezgehê îstîxbaratê zereyî Rêxistina Pawitişê Qanûnê Bingeyî û Mudirîya Asayîşî reyde vila keno. No kerdiş 1994 de bi qerarnameyêkê hukmatê Kohlî kewt dewre.

Wekîla Partîya Çepe Gokaye Akbulut wedaritişê na bire gulane de vist rojdem. Gokaye Akbulut hukmatê federalî yê bi Serekwezîrîya Olof Scholzî ra no qerarname pers kerd. Labelê Wezîrîya Karanê Zereyî rixmo ke eşkera kerd ke înan qerarnameyêko winasên îmza nêkerdo, pare kerd ke no kerdiş dewam keno.

Naye ser o wekîle Akbulute muracatê Dayîreyê Xizmetanê Zanistî yê Meclîsê Federalî kerd û tira pers kerd ke no kerdişo 28 serre yê vera kurdan goreyê huqûqî yo yan nê. Dayîreyî derheqê babete de raporêk amade kerd.

Dayîreyî da zanayene ke no kerdiş goreyê huqûqî nîyo. Rapor de ame vatene eke komeleyêka kurdan bikewa 'rewşêka şikdare' o çax derheqê ci de ganî îstîxbarat bêro dayene. Dayîreyê Xizmetanê Zanistî bi nê hawayî Dayîreyê Îdareyî yo Federal zî rexne kerd.

Wekîle Gokaye Akbulut ard ziwan ke ganî teqîb û morkerdişê komeleyanê kurdan cade biqedîyê. Akbulute bale ante raporî ser û îfade kerd ke çarçewa nê waştişê dayîreyî de Wezîrîya Karanê Zereyî heta vurîyayîşêkê neweyî yê qanûnî arêdayîşê doneyanê serê komeleyanê kurdan wa vindarna.

Hukmatê Scholzî îtîraf kerdbi ke agahîyê serê komeleyanê xerîban, servîsanê îstîxbaratanê xerîban de yenê vilakerdene. Akbulute waşt ke ganî bêro zelalkerdene ke MÎT zî mîyanê nê servîsan de yo yan nê. Akbulute vat: ''Eke agahîyî MÎTî reyde yenê vilakerdene ganî endamê komeleyanê kurdan bêrê hişyarkerdene.''