Pîlotê şerî yê verênî Bahadir Altanî derheqê Qirkerdişê Zaxoyî de ANFyî rê qisey kerd.

Altanî da zanayene ke herçiqas dewleta tirke ci rê vana 'herêma asaye ya bi 30 kîlometreyan' zî seba ke dekewena erdê Başûrî nameyê ney îşxal o. Altanî pê hesna ke nê erdê îşxalkerdeyî de sivîlî tim ameyêne kiştene la seba ke nê sivîlî sey 'terorîst' pênase bîyêne çewî ci rê vengê xo nêkerdêne.

Bahadir Altanî pare kerd ke wexto ke topî erzîyenê pêro herême sey 'herêma dişmenan' û sivîlî zî sey 'terorîstanê PKKyî' dîyenê la narey seba ke erebî merdî ney tesîrêko pîl kerd. Altanî vat: ''Verî ke topî bierzîyê koordîne yena hesabkerdene. Yanî topî wina rehet xeletî ra nêkewenê cayêkî. Merdimê na herême (Başûr) sey terorîstî dîyenê. Wexto ke tîya de sivîlî yenê qetilkerdene îqtîdar vano 'PKKgîrî kişîyayê.' PKK partîyêk a û xora endam û sempatîzanê ci est ê. Ney ra sebeb çew nêeşkeno sivîlan bikişo. Wezîrîya Karanê Zereyî mesuldarîya nê qirkerdişî eşte milê artêşa tirke ser û vat 'goreyê agahîyanê ke artêşe dayo.' La mesuldarê nê hêrişî îqtîdar o.

Îqtîdar keno ke nê operasyonanê leşkerîyan de ser bikewo û şoro weçînayîş. La îqtîdar Avaşîn, Zap û Metîna de teng mendo coka îşxalê Rojawanî reyna vist rojdem. Artêşa tirke nameyê îqtîdarî ser o sûcan keno û muxalafetê Tirkîya vengê xo nêkeno. No çi karê AKPyî rê beno. Ganî muxalefet vera ney tewirê xo bimojno.''