Hêrişê îşxalî yê dewleta tirke yê vera Rojawanî Amed û xeylêk bajaranê Kurdîstan û Tirkîya de ameyî protestokerdene.

Amed de çalakîya ke verê banê DBPyî de ameye kerdene, xeylêk temsîlkarê partîyanê sîyasîyan û rêxistinanê komelê sîvîlî tewrê ci bîyî.

Hemsereka DBPyî ya Amedî Sultane Yaray vat: ''AKP-MHPyî vat 'ma do prosesêkê neweyî bidê destpêkerdene' la pratîk de dişmenîya vera kurdan ramojnaye. Rojawan de sîvîlî hedef girewtî. Hêrişê vera fabrîka û nêweşxaneyan  de sîvîlan û tutan dinyaya xo bedilnaye. Ma vanê dirîyîya şima rê hinî bes o. Hinî bi vatişî kurdan mexapînê. Şerê biqêdînê.  Heta no şer nêro vindarnayene, têkoşînê ma do dewam bikero.''

Hemserekê DEM Partî yê Amedî Abbas Şahîn zî vist vîrî ke hêrişanê peyênan de domanî zî tede 27 kesan dinyaya xo bedilnaye û vat: ''Qala haştîye kenê la qirkerdişê kenê. Polîtîkayê şerî çare nêbenê. Ma veng danê îqtîdarî, ma do vera şerî çirey bêveng memanê. Hêrişê ke çarçewaya sûcanê şerî de yenê kerdene ganî cade bêrê vindarnayene.''

Wekîka DEM Partîya ya Amedî Adalete Kaya zî vist vîrî ke firin û nêweşxaneyî zî yenê hedefgitewtene  û vat: ''Hêrişê verê ê kesan yenê kerdene ke haştîye wazenê. Şar feqîr o, tengayî de yo. Cinîyî yenê qetilkerdene, domanî raştê îstîsmarî yenê.  Wextê haştîye yo. Ganî semedê haştîye gamî bêrê eştene. Tirkîya bi nê hêrişan huqûqê mîyanneteweyîyî binpay kena. Ganî rêxistinê demokratîkî verê nê de vinderê.''

Reyna xeylêk bajaranê bînan ê Kurdîstan û Tirkîya de bi çalakîyanê cîya cîyayan hêrişê îşxalî yê vera Rojawanî ameyî protestokerdene û mesajê xurtkerdişê têkoşînî ameyî dayene.