Amed de temsîlkaranê partîyanê sîyasîyan û rêxistinanê komelê sivîlî yê sey DBP, HDP, Partîya Çep a Keske, Partîya Merdiman û Azadîye (PÎA), Partîya Sosyalîste ya Kurdîstanî (PSK), PDK-Tirkîya, PDK-Vakur, Partîya Azadîye, Têgêrayîşê Azadîye, DDKD, Platformê Ziwanê Kurdkî, Komeleya Şêx Seîdî û Platformê Yewîya Cinîyan ê Kurdan Komeleya Rojnamegeranê  Vakurrojhelatî derheqê serrgêra 100. ya Peymana Lozanî de eşkerayîyêke daye.

Serekê PDKyî Bayram Bozyelî û Hemsereka DBPyî Salîha Aydenîz eşkerayîye wende.

Eşkerayîye de ame parekerdene ke Peymana Lozanî îmzakerdişî ra nata 100 serrî xo pey de verdayê û kurdî çarçewa dîyarkerdişê qederê xo de na peymane qetî qebul nêkenê. Eşkerayîye de ame vatene ke rîyê Peymana Lozanî de Komara Tirkîya bingeyê tirkbîyayîş û nîjadperestî de ronîyaya, kurdkî ameye qedexekerdene, Kurdîstanî ra kurdî pê zorî ameyî vetene û kurdî ameyî qirkerdene.

Eşkerayîye de bale ameye antene ser ke nê 100 serran de qirkerdişan ra heta tepiştiş û surgunkerdişî zaf çîyî ameyê kurdan sereyî û hema zî nê kerdişî dewam kenê.

Eşkerayîye wina dewam kena: ''Ewro vera Herêma Kurdîstanî û Îdareyê Xoserî yê Rojawanî hêrişî dewam kenê, vera îradeyê şarê ma qeyûmî tayîn benê, partîyê ma binê gefê qefilnayîşî de yê, vera kadroyanê sîyasîyan operasyonî yenê kerdene û polîtîkaya tecrîdî yena caardene. Xora vera nê kerdişan têkoşînê azadîye yo neteweyî zî dewam keno.

Şarê ma çar parçeyanê Kurdîstanî vera hêriş û qirkerdişan têkoşînê azadîye keno. Ma girîngêkê pîlî danê statuyanê Başûr û Rojawanî û qewimîyayîşanê Rojhelat û Vakurê Kurdîstanî. Seba kurdan mefteyê azadîye dîyalog, paştdayîş û yewîya neteweyî yê. Ganî kurdî heqê polîtîkayanê cîyakerdişî ra bêrê û Peyman Lozanî pûç bikerê.

Ma venga îmzadaranê Lozanî Îngilîstan û Fransa danê ke wa şarê ma ra uzrê xo biwazê. Ma venga Konseya Ewropa, Neteweyanê Yewbîyayeyan, Yewîya Ewropa û dezgehanê mîyanneteweyîyan danê ke paştî bidê têkoşînê şarê ma yê 'dîyarkerdişê qederê xo' û têkoşînê vera Peymana Lozanî.

Şarê ma yê kurdî wazeno ke bi hawayêkê têdûşt, azad û bi ziwanê xo û nasnameyê xo biciwîyo. Ma venga dewleta tirke danê ke herinda qiseyanê sey 'Ma komare pîya naye ro, ma way û bira yê' de huqûqî bîyare ca; herinda înkar û îmha de meseleya kurdan çareser bikera. Wa heqê kurdan bi qanûnan bişinasîyê. Heqê kurdan est ê ke erdê xo de bi rûmet û azadî biciwîyê û no şertê aramîya herême yo zî.''