Waqayê janê Korona groyê doneyan vera zêdîyenê. Goreyê hewteyê vîyarteyî waqayî qasê 56.017 zêdîyayî. Sereka Odaya Tabîban a Amedî Elîfe Turan Ajansê Mezopotamya rê qisey kerd û pare kerd ke hûmara raştikêne ya waqayanê janê Korona doneyanê dewlete ra zaf zêdeyêr a.

Turane bale ante ser ke dewlete û Wezîrîya Weşîye nînan de doneyanê raştikênan pare nêkenê la Amed de pêro doktorî rewşe ra hayîdar ê. Turane vat: ''Embazê ma yê doktorî vanê ke şaristan de her di testan ra yewê ci pozîtîf vejîyeno.''

 Turane îfade kerd ke seba ke tedbîrê vera Korona wedarîyayî şar de hişmendîya 'jan qedîyayo' est a la hema zî jan nêqedîyayo. Turane ard ziwan ke ganî şar tedbîranê xo bigêro û vat: ''Ma maskeya xo mevejê, hîjyenê destî ra dîqat bikerê, sîrkulasyonê zêdeyî yê hewayî ra dûrî vinderê.''

Turane dîyar kerd ke tedbîranê şexsîyan ra wetêr ganî dewlete bi xo tedbîran bigêra û seba tesd û derzîne şarî teşwîq bikera, malzemeyanê hîjyenî bêpere vila bikera, karantîna nêweşan rê ferz bikera.