Amed de Nobeta Demokrasîyî verba xespanê qeyûmî roja 43'ine de dewam kena. Hemşaredarê Amedî Selçuk Mizrakli, wekîlê HDP'yî, 17 hemserekê şaredarîyanê ke Hemserekê Elîh û Hekarî zî tede yê û endamê meclîsê şaredarîyan, endamê Meclîsî yê Mayê Haştîye, TJA, rêxistinê gêncan û bi seyan kesî Cehdeyê Lîseyî de tewrê çalakîye bîyî. Çalakîye de sloganî ameyî vatene û çepikî ameyî pirodayene.

Hemserekê HDP'yî yê Amedî Zeyat Ceylanî da zanayene ke heta ke qeyûmî şorê, do ê xo ver bidê. Zeyatî veng da şarî ke dormeyê xoverdayîşî de bêrê pêser. Ceylanî bale ante kampanyaya îmzaya ke hetê HDP'yî ra ameye destpêkerdene û vat ke kampanya zaf eleqe vînena.

'Ma do Gama xo Peyser Nêerzê!

Hemşaredarê Colemêrgî Cîhan Kahramanî zî bi nameyê hemşaredaranê  ke ameyî çalakîye qisey kerd: "Tarîxê xoverdayîşê Kurdan de Şêx Seîd û Seyît Riza ra nata yew tradîsyonê xoverdayîşî esto. Nê tradîsyon qet gama xo peyser nêeşte û do nêerze. Ma nika meydanan de verba qeyûman xo ver danê. Qeyûmî do şorê."

Wekîla HDP'yî ya Amedî Salîha Aydenîz zî îfade va: "Xoverdayîşê ma verba polîtîkayanê hêrişî se serran ra dewam keno. Înan ke îradeyê ma rê qeyûmî tayîn kerdî, benê sebebê merdişê ma zî. Teyna pê wesayîtanê zirxinan bi desan merdimî merdî. Şarê Tirkî zî  vejîyeno meydanan û bi nê hewayî paşt dano şarê Kurdo ke têkoşînê seba pîyaciwîyayîşî dano." Dimayê qiseykerdişan çalakîya roniştişî dest pêkerde.