Nobeta Demokrasîyî ya Amedî verba xespkeridşê  qeyûman roja 48'ine de dewam kerde. Nobete Cehdeyê Lîseyî de pê deyîran û sloganan dest pêkerde û Serekwekîla Grûba HDP'yî Fatma Kûrtûlane, wekîlê HDP'yî, Wekîla Partîya Sosyal-Demokrate ya Almanya Kirsten Luhmanne, Mayê Haştîye, aktîvîstê Têgêrayîşê Cinîyanê Azadan tewrê çalakîye bîyî. Dîrektor Çayan Demîrel zî tede endamanê Platformê Haştîye û Sînemayê ke Stenbol û Enqere ra ameyî paştî daye çalakîye.

Vervatoxa Platformê Haştîye û Sînema Bingol Elmase da zanayene de sînemakarê seba ke paştî bidê şarê Amedî tewrê Nobete bîyî û êyê ke îradeyê şarî xesp kerd do qet ser nêkewê. Bingol Elmase va: "Ma vanê Amedo azad û sînemaya azade."

'Ocalan Eşkeno Şerî Biqedîno'

Serekwekîla Grûba HDP'yî Fatma Kûrtûlane ard ziwan ke çareserîya meseleya Kurdî elzem a û va: "Şima nêeşkenî meseleya Kurdî pê polîtîkayanê asayîşî çare bikerê. Şima ra ver zî zafê kesan waşt ke wina bikerê. La nêbi, ê nêeşkayî bikê. Şima zî do nêeşkê. Xora peynîya şima nêzdî ya. Şima 40+1 ard verê çimanê rayaumûmîyî, coka şima zî netîce vînenî."

Kûrtûlane qiseyê Ocalanî yê "Ez eşkena hewteyêk de şer biqedînî" vist vîrî û va: "Haştîye pê dîyalogan yena meydan. Eke Birêz Ocalanî reyde dîyalog bêro kerdene, o eşkeno nê şerî biqedîno û o bi xo vano ke o naye rê amade yo. Şar paştî dano Ocalanî. Eke wina bibo, meseleya tewr pîlêr a Tirkîya Meseleya Kurdî bi hewayêkê demokratîkî do bêro çarekerdene.‘‘