Dewleta tirke 27ê nîsane de dewa Zengesorî ya qezaya licê ya Amedî de operasyonê leşkerî da destpêkerdene  û 29ê nîsane de 6 gerîlayê cinîyî şehîd bîyî.

Cenazayê gerîlayan Sûna Taş ( Nûjîne Amed), Aynure Ulugana (Besê), Latîfe Haibi, Dîlane Silinsin û di gerîlayê ke nameyê înan nêame zanayene semedê otopsî Nêweşxaneyê Cigêrayîş û Perwerdeyî yê Gazî Yaşargîlî yê Amedî de yenê pawitene.

Keyeyê Ulugana, Taşe û Silinsine ke semedê girewtişê cenazayanê xo 17ê gulane de ameyî Amed,  20ê gulane de muracatê Dozgerîya Licê kerd. Dozgerîye de nimûneya gonî ameye waştene. Keyeyan eynî roje de nimûneyî dayî. Keyeyî semedê girewtişê cenazayanê xo netîceya testê DNA pawenê.