Merdimanê tepişteyan Baroyê Amedî de seba ke bale binancê rewşa tepişteyanê nêweşan ser Nobeta Edaletî daye destpêkerdene. Çalakîye roja vîstene de dewam kena. Merdimê tepişteyan Feyzîye Kolakan, Încî Guler Altindag, Hasîna Guler, Reşayet Ada û Hakki Boltan ewro tewrê çalakîye bîyî.

Hemserekanê HDPyî yê Amedî Zeyyat Ceylan û Gulîstane Atasoy û xeylêk partîyijan ewro çalakwanî zîyaret kerdî. Hasîne Gulere ard ziwan ke rewşa tepişteyan xirab a û heqê înan ê esasî yenê binpaykerdene. Zeyyat Ceylanî ard ziwan ke rewşa tepişteyan semedê înan bimbarek a û vat: ''No têna têkoşînê merdimanê tepişteyan nîyo. Ganî her kes paştî bido nê têkoşînî. Eke ma veng bidê vengê tepişteyan çew nêeşekno înan rê zulm bikero. Eke ma têkoşîn bikerê tepişteyê nêweşî yenê tedawîkerdene. Tepişteyê ke 30 serrî zîndan de înfazê înan yenê vêşnayene û nînê tehlîkerdene. Eke vengê şarî bibo berz na bêhuqûqîye qedîyena.'' Gulîstanê Atasoy zî vist vîrî ke vera tepişteyanê sîyasîyan nêzdîbîyayîşo cîya esto vat ganî tepişteyê nêweşî bêrê veradayene. Merdimanê tepişteyan ra Hakko Boltanî zî vat ê semedê her kesî edalet wazenê û waşt wa paştî bidîyo çalakîya înan.