Seba ke binpaykerdişê heqanê merdiman û îşkenceyê vera merdimanê xo yê tepişteyan teşhîr bikerê û paştî bidê tepişteyan Baroyê Amedî de Nobeta Edaletî ya keyeyan dewam kena.

Merdimê tepişteyan 18 rojî yo nobete rê dewam kenê û anê ziwan ke heta waştişê înan bêrê caardene têkoşînê xo rê dewam bikerê. Nê merdiman ra yew zî Hakki Boltan o. 

Lajê Hakki Boltanî Ciwan 2008 de bi bahaneya ke 'kerra eşta polîsan' tepişîya û 6 mengan ra dima vera dîya. Ciwanî dima ke zîndanî ra vejîya eşkerayîye dabî û vatbi: ''Mi îşkence dî. Ez hîna zêde hêrs bîya. Ez neçare menda ke dibistane ra fek vera bida. Çunke nêverdenê ez biwana.''

Ciwan wextê dewa de tewrê gerîlayan bi. O 2012 de şer de Çewlîg de bi giranî birîndar bi. Pê vateyê 'merdo' Ciwan ame dekerdene torbaya cesedî la morg de ame famkerdene ke weş o. Destê Ciwanî de bomba teqabî. Mikê ci yo raşt tira bi, çimê ci yo çep bi temamî, çimê ci yo raşt zî se ra 70 nêeşkeno bivîno. Hema zî bedenê ci de parçeyê bomba estê. O pê hetkarîya embazê xo yê koxûşî ciwîyeno.

Ciwan Zîndanê Amedî de tepişîyeno û derheqê ci de 3 îdîanameyî ameyî amadekerdene. Îdîaname de ame waştene ke cezaya muebede ya girankerde û cezaya zîndanî ya 154 serran bêra dayene ci. Mehkeme dima cezaya muebede ya girankerde û cezaya zîndanî ya 95 serran û 4 menga  daye Boltanî.

Avûkatê Ciwanî Mehdî Ozdemîrî muracatê Mehkemeya Qanûnê Bingeyî kerd û ceza rê îtîraz kerd. La mehkeme muracat red kerd. Ozdemîrî dima zî muracatê Mehkemeya Heqanê Merdiman a Ewropa kerd.

Ciwan rixmê astengîyanê bedenê ci zî zîndan de yo û maruzê îşkence, teda û têgêrayîşanê xiraban beno. Babîyê Ciwanî Hakki Boltanî keyeyanê bînan reyde 18 rojî yo Baroyê Amedî de çalakîye de yo.

Babî Boltanî armanc û sebebanê çalakîya xo ser o ANFyî rê qisey kerd.

Boltanî ard ziwan ke tedaya vera tepişteyan zêdîyena vat: ''Pê qanûnê înfazî tepişteyê ke cezaya înan qedîyaya vera nêdîyenê. Mîyanê huqûqî de cayê nê kerdişî çin o. Tirkîya de vera domananê ma huqûqêko cîya yeno caardene. Ma wazenê neheqîye nêra kerdene. Ma wazenê qanûnî seba tepişteyanê sîyasîyan zî bêrê caardene. Bi hawayêkê dişmenîye ê nêzdîyê domananê ma benê. Biranê Mehkemeya Heqanê Merdiman a Ewropa zî nêşinasnenê. Heta ke waştişê ma bêrê qebulkerdene ma tîya de yê.''

Boltanî venga rêxistinanê komelê sivîlî, dezgehanê rayaumûmîye, huqûqnasan û beşanê komelî da ke bêveng mebê û vat: ''Êyê ke ewro paştî danê ma paştî danê xo. Edalet her kesî rê lazim o. Bêvengîye tewirêko masumane nîya. Armancê bêvengîye ya qesawet o yan zî menfaat o.Seba cuyêka azade û edîle ganî veng bêro vetene. Coka ganî kesêk bêveng nêmano, biqîro.''