Merdimanê tepişteyan Baroyê Amedî de seba ke bale binancê rewşa tepişteyanê nêweşan û binpaykerdişê heqanê tepişteyan ser Nobeta Edaletî daye destpêkerdene. Çalakîye roja 12. de dewam kena. Merdimanê tepişteyan derheqê zextê zîndanan û armancê çalakîya xo de ANFyî rê qisey kerd.

Waya Abdulselam Gulerî yo ke Zîndanê  Tîpê Dyî yê Amedî de yo, Încî Guler Altindag nê vatî: ''Zîndanan de zext û binpaykerdişê heqan bitaybetî wextê janî de zêdîyayî. Ma nê caardişan qetî qebul nêkenê. Qanûnê neweyî ke vejîyenê semedê tepişteyanê sîyasîyan nînê caardene. Ma veng danê heme merdimanê tepişteyan ke wa bêrê vengê xo berz bikerê. Ma semedê caardişê edaletî û merdimanê xo zulmî ra bixelisnê tîya de yê. Wa heme rêxitinê komelê sîvîlî vengê ma bieşnawê û paştî bidê ma.''

Cinîya Siddik Gulerî yo ke Zîndanê Îskenderunî de yo, Hasime Guler zî ard ziwan ke hem mêrde hem zî lajê aye zîndan de yê û vat: ''Rîyê janî ra di serrî yo ez nêeşkena înan dir pêvînayîş bikerê. Domanê mi şinê înan vînenê. Goreyê vatişê înan babîyê înan pê sandalîyê bigogerî yeno pêvînayîş. Rixmo ke ma waşt wa Zîndanê Dîlokî ra bêro Zîndanê Amedî înan o berd Îskenderun. Uca di rey pê Korona nêweş kewt bi mengan karantîna de mend. Ma nêwezanê merdimê ma hinî binê şertan de zîndan de bimanê. Ma edalet wazenê. Wa pêro merdimê tepişteyan paştî bidê ma ke verê nê zulmî bêro girewtene.''

Waya Hamdusana Ada yo ke Zîndanê Tîpê Tyî yê Amedî de yo, Reşahate Ada ard ziwan birayê ci zîndan de raştê îşkeneyî ameyo û vat: ''Ma wazenê ke wa na bêhuqûqîye cade biqedîyo. Ma heq û huqûqê xo wazenê. Wa hinî dayîkî mebermê. Edalet û haştîye bêrê. Dayîka mi bi serran o lajê xo nêvînena. Cuya ma serûbin bîya. Ma ameyî yew hale ke ma vanê vera zextanê ke merdimanê ma rê yenê kerdene, ma şirê verê zîndanan de xo bivêşnê. Verê hîrê mengan 20 kesan birayê mi kişto. Ma zî ameyî tîya ke nê zextan protesto bikerê. Wa goş bidîyo vengê ma. Huqûqnasî û merdimê tepişteyanê bînan wa paştî bidê.''