Amed de sekêşîya Komeleya Heqanê Merdiman (ÎHD) Komeleya Huqûqnasanê Seba Azadîye (OHD), Odaya Tabîban a Amedî, Weqfê Heqanê Merdiman (TIHV), Komeleya Cinîyan a Rosa, Baroyê Amedî de bi wesîleya 10-17ê Kanûne Hewteyê Heqanê Merdiman rayraşîyayîş ame kerdene.

DBP, HEDEP û temsîlkarê xeylêk dezgehan tewrê çalakîye bîyî. Rayraşîyayîş de  pankartê “Daxuyanameya gerdûnî 75 salî ye… Aştî bi mafên mirovan pêkan e” ame akerdene û sloganê sey “Jin, jiyan, azadî” û  “Heq, huqûq, adalet” ameyî vatene.

Badê rayraşîyayîşî verê Pêkerê Heqanê Merdiman ê Parka Koşuyolu de eşkerayîye ameye dayene. Eşkerayîya ke 44 dezgehan morê xo da piro hetê Sereka Odaya Tabîban a Amedî Elîfe Turan ra ameye wendene.

Eşkerayîye de ame vîrvistene ke Tirkîya de huqûq werte ra ameyo wedaritene û vatene: ''Cenazayê mîlîtananê ke pêkewtişan dinayaya xo bedilnaye, erey û bi tewirê bêhurmetî dîyenê keyeyan. Heqê definkerdişî yê cenazayan yeno binpaykerdene. Xeylêk kedkarê çapemenîye ameyî destbendkerdene û tepiştene. Heqê weşîye yê tepişteyan yeno binpaykerdene. Reyna tepişteyî bi qeraranê keyfîyan nînê veradayene. Abdullah Ocalan, Veysî Aktaş, Omer Hayri Konar û Hamili Yildirim ê ke Îmrali de yê bi serran o tira xebere nîna girewtene.

Ganî cade Îmrali de pêvînayîşan avûkatan û keyeyan bêro kerdene. Ganî zîndanê domanan cade bêrê qefilnayene. Seba ke meseleya kurdan çareser nêbîya, binpaykerdişê heqan zêdîyayî. Rîyê polîtîkayanê hêrişkaran ra her roje pêkewtiş û merg est o. Ganî tecrîd bêro wedaritene û meseleya kurdan bi rayîrê dîyalogî bêra çareserkerdene.''