Merimê tepişteyan seba ke bale biancê rewşa tepişteyanê nêweşan û tepişteyê ke rixmo ke cezaya înan qedîyaya nînê veradayene ser 52 rojî yo Baroyê Amedî de Nobeta Edaletî tepişenî. Merdimê tepişteyanê ke şîyî Anqara partîyanê sîyasîyan û rêxistinanê komelê sîvîlî reyde pêvînayîşî kerdî.  Hetê bînî ra Amed de zî çalakîye ameye domnayene.

Merdimanê tepişteyan ra Fevzîye Kolakan ard ziwan ke domananê înan çîyêko xirab nêkerd û vat: ''Seba ke domananê ma waşt bi ziwanê xo biciwîyê emeyî tepiştene. Wa domanê ma bêrê tedawîkerdene. Zîndanan ra cenazayê mevejîyê. Wa cade heme tepişteyê nêweşî serbest bêrê veradayene. Wa hinî vengê ma bêro eşnawitene.  Berê ma pêro pîya vengê xo berz bikerê, bi têkoşînî verê zulmî bîgêrê.''

Dayîka Gulîstane Ala ke Zîndanê Qeyserî de ya Emîne Al zî ard ziwan ke a semedê paştdayîşê nobete ameya û gama ke qala kênaya xo kerd înan senî telefon de qisey kerdo hesir kerdî war. Emîne Al vat: ''Kênaya mi vat cayê înan zaf serdin o û werd nêdîyeno înan. Domanê ma serdî ra nêeşkenê rabikewê. Çîyê wînayênî nînê qebulkerdene. Ê se kenê wa bikerê ma do tim wayîrê domananê xo vejîyê. Wa heme dayîkî paştî bidê çalakîye ke ma haştîye bîyarê.''