Merdimanê tepişteyan Baroyê Amedî de seba ke bale binancê rewşa tepişteyanê nêweşan ser Nobeta Edaletî daye destpêkerdene. Çalakîye roja 44. de dewam kena. Çalakwanî wazenê ke tepişteyê nêweşî û ê ke înfazê înan ameyî vêşnayene wa bêrê veradayene.

Merdimanê tepişteyan ra Hakki Boltanî vat heta netîcegirewtişî ê do çalakîya xo bidomnê. Boltanî vat: ''Waştişê ma yo verên oyo ke tepişteyê nêweşê ke rewşa înan zaf giran a, nêeşeknê zîndan de bimanê wa bêrê veradayene. Ê diyînî zî tepişteyê ke rixmo ke cezaya înan qedîyaya 30 serrî yo zîndan de yê wa bêrê tehlîyekerdene.''

Merdimanê tepişteyan ra Fevzîye Kolakanî zî vat: ''44 rojî nê 44 serrî bêro dergkerdene zî ma do semedê veradayîşê tepişteyanê nêweşan nê têkoşînî bidomnê.''