Teda, hêriş û polîtîkaya îşkenceyî ya dewleta tirke zîndanan de her ke şino zêdîyenê. Têkoşînê keyeyanê tepişteyan zî dewam keno. Keyeyê tepişteyanê nêweşan û tepişteyanê ke cezaya înan qedîyaya la vera nêdîyenê 38 rojî yo Baroyê Amedî de Nobeta Edaletî kenê.  

Hasîne Guler zî Nobeta Edaletî de ca gêna ke mêrdeyê ci Sidik Guler 26 serrî yo, lajê ci Habîp Guler 18 serrî yo tepişte yê.

Hasîne Guler wina qala tepişîyayîşê mêrdeyê xo kerd: ''Şewdirêk wexto ke mêrdeyê mi nimaj kerdêne înan eşt keyeyê ma ser. O seba serebûtêko ke eleqeyê ci pê çinbi tepişîya û cezaya 26 serran dîyaye ci. Ma ey ra dima zaf zehmet dî. Rayêk mêrdeyê mi vera dîya la dima tepişîya. Verî Zîndanê Amedî de bi la dima surgunê Aydinî ame kerdene. Tewr peyên zî o surgunê Zîndanê Îskenderunî bi. Mêrdeyê mi 3 reyî anjîyo bi, çimanê xo ra amelîyat bi. Wexto ke ey benê nêweşxaneyî zî kelemçeyê ci anêkenê. O bi korona zî kewt û 3-4 mengan karantîna de mend.

Lajê mi Habîp zî wexto ke gerîla bi Heskîf de tepişîya û 18 serrî yo zîndan de yo. Çimê lajê mi hol nêvînenê. Linganê ci de nêweşîye esta. 26 serrî yo ma hê rayîrê zîndanî ra şinê yenê. Ma her roje mirenê. Wexto ke mêrdeyê mi tepişîya di kênayê mi zî tepişîyayî. Mi rê îşkence ame kerdene, didanê mi ameyî şiknayene. Xora ma dewa xo ra zî koç kerd. Ma mejbur ê şaristan de bimanê la çew keye nêdano ma. Hetê ekonomîkî ra zaf tengîya ma esta.

Wexto ke lajê mi tepişîyabi mi o nêşinasna çunke mi 15 serran nêdîbi. Lajê mi Zîndanê Kandira de bi, nêweşîyanê xo ra ez nêeşkaya şora ey bivîna. ''

Hasîne Guler îfade kerd ke lajê ci yo bîn Yakup Guler zî tewrê têkoşînî bi, şehîd bi labelê înan bi serran cenazaya ci nêdîye. Hasîne Guler vat: ''Xebere ameya ma ke o Pasûr de şehîd bîyo, pa 20 embazanê xo vera înan dafike ronîyaya. Keyeyêk de jehr danê înan û dima zî teslîmê dewlete kenê. Jehr zî qîm nêkerd înan guleyî rişnayî domananê ma ser. Cenazayê gerîlayan helîkopterî ra erzîyayî cayêkî. 15 cenazayî 7 mengan erd de mendî. Dima dewijan seba wedarnayîşê cenazayan waştişname dayo. Netîce de dewlete cenaza cayêk de nimnayî û nika ma nêzanenê ke cenazayî kamca de yê. Zerrîya ma vêşena. Rixmê hende çîyan zî ma haştîye û têdûştîye wazenê.''