Keyeyê tepişteyan seba veradayîşê tepişteyanê nêweşan û tepişteyanê ke cezaya înan qedîyaya la vera nêdîyenê bînaya Baroyê Amedî de 29 rojî yo Nobeta Edaletî gênê. Waya Abdulselam Gulero ke Zîndanê Amedî de tepişîyeno Încîye Guler Altindag roja destpêke ra nata nobete de ya.

Gulere ard ziwan ke kekê ci Abdulselam 1993 de wexto ke karê ciwanan kerdêne tepişîya û 29 serran de surgunê xeylêk zîndanan ame kerdene. Gulere da zanayene ke kekê ci semedê vurnayîşê qanûnê înfazî vera nêdîya. 

Încîye Guler Altindag vat: ''29 serrî yo ez seba kekê xo têkoşîn kena. O zîndan de, ma teber de têkoşîn kenê. Dadî û babîyê mi waştêne reya peyêne kekê mi bivînê la heyf ke ê zî şîyî rehm. Ez kekê xo reyde bîya pîl labelê dima ke o tepişîy ma yewbînan ra cîya bîyî. Emrê kekê mi zîndanan de derbaz bi. Nê zîndanan de îdareyî ra heta gardîyanan her kesî kekê mi rê vatêne 'terorîst.' Kekê mi wexto ke zîndananê Tirkîya de tepişîyayêne ma ke şîyêne uca şaro herêmî bi hawayêkê xirabî nêzdîyê ma bibîyêne. Rojêke seba pêvînayîşî ez şîya Bandirma. Seba pêvînayîşî wextê ma estbi. Coka ma qeşaşit girewt. Rotoxê qeşaşitî dima ca ke eke ey bizanitêne ma amedij ê qeşaşit do nêrotêne ma. Mi qeşaşit apey da ci û vat eke o biameyêne Amed ma tira pere zî nêgriewtêne.''

Încîye Guler Altindag 29 rojî yo seba kekê xo nobete de ya. A wazena birayê ci û pêro tepişteyê sîyasîyî wa vera bidîyê.