Amedsporî îstîfayê Îbrahîm Cezayîrî ra dima seba dîrektorîya teknîke Oktay Derelîogluyî reyde pêkerd. Çarçewa pêkerdişî de bi tewrbîyayîşê Serekê Amedsporî Metîn Kilavuzî û endamanê Amedsporî Tesîsanê Sporî yê Şehmus Ozerî de Oktay Derelîogluyî kontrat îmza kerd.

îmzakerdişê kontratî ra dima Derelîogluyî qisey kerd û vat: ''Ez pê sereberz û rûmetên a ke bîya dîrektorê Amedsporî. Ez pê bawer a ke ma pê paştdayîşê terefgîranê xo nê prosesê bizehmetî ra do derbaz bibê.''

Serekê Amedsporî Metîn Kilavuzî zî vat: ''Dîrektorîya Oktay Derelîogluyî seba ke ma prosesê bizehmetî ra derbaz bibê do girîng biba. Wa komelê Amedsporî rê xêyrên bo.''

Amedsporî lîg de 4 maçanê peyênan de têna puanêk girewt û temamîya 27 maçan de 28 puanî girewtî. Amedspor lîsteya lîgî de rêzê 15. de yo. 

Hewteyê vîyarteyî de dima ke Amedspor sahaya xo de vera Pendîksporî de bin kewt Îbrahîm Cezayîrî îstîfa kerd.