Rixmo ke hukmat paştdayîşo ke mîyanê şarî de yeno mûntene sey tehlukeyî vîneno û wazeno vernîya ci bigêro HDP xebatanê xo yê semedê paştdayîşê şarî rê dewam keno.

Hemserekê  Partîya Demokratîke ya Şaran (HDP) yê Anqara Vezîr Coşkun Parlakî ard ziwan ke ê paştdayîş û barekerdişî gird kenê. Parlakî ard ziwan ke semedê tedbîranê vera janê Korona vanê ke 'keye de bimane' la nêvanê ke ê senî do îdareyê xo bikerê û şar şertena zehmetan de têna maneno.

Parlakî vat: ''Prosesê janî de dewelete sosyalî senî wayîrê hemwelatijanê xo vejîyenê Tirkîya têna kolonya û maskeyan vila kena ke heqê ey ra zî nîna. Baco ke şar dano ganî sey paştdayîşê sosyalî şarî rê agêro la şarê ma tengayî pîle anceno. Herinda ke dewlete wayîrê şarî vejîyo bi kampanyaya ma ma rê besê şarî ra yeno waştene ke wayîrê dewlete bivejîyo. Hukmat paştdayîşo ke mîyanê şarî de yeno mûntene sey tehlukeyî vîneno. Rixmê naye ma bi kampanya hetkarî resnenê şarî. Paştdayîş mîrasê ma yo komelkî yo. Ma heta nika 300 keyeyan rê hetkarîya zexîreyî kerde û 140 keyeyî zî kerdî wayîrê keyeyê wayûbirayî. 550 keyeyan muracatê ma kerd. Ma do paştdayîşî  bidomnê.''