Îdarekaranê Komeleya Heqanê Merdiman (ÎHD) ê Wanî ra Heval Sînan Arasî derheqê tecrîdê vera Rayberê Şarê Kurdî Abdullah Ocalanî û qanûnanê înfazî de ANFyî rê qisey kerd.

Arasî ard ziwan ke goreyê qanûnê înfazî bi belgeyêka nêweşxaneyî yan zî yê Dezgehê Tipê Edlîyî cezaya tepişteyanê nêweşan eşkena bêra taloqkerdene û vat: ''Heyf ke na babete de erk û heqê ke dozgeran rê dîyayê, bi hawayêkê keyfî şuxilîyenê û dûştê tepişteyanê nêweşan birî gêrîyenê.''

Arasî îfade kerd ke vera tepişteyanê grevê vêşanîye bi hawayêkê giranî binpaykerdişê heqan qewimîyenê û vat: ''Tirkîya goreyê peymanan tênêgêrena ke morê xo dayo binî ro. Qanûno Bingeyî, Qanûnê Ceza û Qanûnê Înfazî yê Tirkîyan yenê binpaykerdene. Kontrolê weşîye û dermanê hewceyî nênê dayene. Bi taybetî cezayê dîsîplînî tecrîdî ferz kenê.''

Arasî da zanayene ke zîndananê bi tîpê Fyî reyde zîndananê bi tîpê Syî û bi asayîşê berzî de zî tecrîd yeno ferzkerdene û vat: ''Mîyanê ceza de ceza dîyena tepişteyan. Tepişteyî hucreyê yewkesî de ver dîyenê û hetê fikrî ra yenê kiştene. Cayanê dûran de, zîndanan de tepişteyî keyeyê xo ra dûrî de tepişîyenê.''

Arasî bale ante ser ke tecrîdê vera Rayberê Şarê Kurdî vera Qanûnê Cezayan û Qanûnê Înfazî yo û vat: ''Goreyê qanûnan ganî Birêz Ocalan bieşko keye, merdim û avûkatanê xo bivîno. 35 mengî yo nê heqê ey yenê astengkerdene. Mewzuato qanûnî nêno caardene. Bi îzolekerdişê Abdullah Ocalanî bingeyê polîtîkayanê şerî de wazenê meseleyya kurdan bêçare bikerê. Bi tecrîdî verê çareserîya demokratîke, haştîyane û aqilane ya meseleya kurdan yeno girewtene.''