Endama Konseya Serekîya Pêroyî ya KCKyî Sozdare Avesta derheqê Hemleya 'Abdullah Ocalanî rê Azadîye, Meseleya Kurdan rê Çareserîya Sîyasîye' de ANFyî rê qisey kerd.

Qiseykerdişê Sozdare Avesta ra tay noqtayê girîngî wina yê:

''Ez Hemleya 'Abdullah Ocalanî rê Azadîye, Meseleya Kurdan rê Çareserîya Sîyasîye' selam kena. Netîceya têkoşînê Rayber Apoyî yê 50 serrî de na hemle vejîyaye werte. Rayber Apo 25 serrî yo Îmrali de binê tecrîdêkê giranî de yo û 25ê adara 2021î ra nata tira xeberêke nêna girewtene. Rayber Apo hînî teyna lîderê kurdan ney lîderêko global o. Bi na hemle ganî qetî azadîya Rayber Apoyî bêra caardene. Rayber Apoyî pêro emrê xo de seba azadîya cinîyan û şaran têkoşîn kerd. Nika pêro dinya seba azadîya ci na hemle daye destpêkerdene. Coka na hemle zaf girîng û stratejîk a.

Dima ke na hemle dîyaye destpêkerdene Rojhelatê Mîyanênî û dinya de eşkerayîyî ameyî dayene û paştî dîyay hemle. La ma pê bawer ê ke na hemle teyna bi eşkerayîyan sînordar nêmana. Ganî na hemle bi rayîr û metodanê cîya û afernayoxan dewam bikera. Ganî sere de ciwanê enternasyonelî cinî û ciwanî zî serkêşîya na hemle bikerê. 

Dewleta tirke bi çalakîya fedayî ya Anqara mat menda û hêrişê xo yê vera ciwanan zêdînayî. Çalakîkeranê fedayîyan Rojhat Zîlanî û Erdal Şahînî bi çalakîya xo ya Anqara mesajêk da dişmenî. Dewleta tirke na çalakîye kerde bahane û ancî hêrişê Rojawanî kerd. Dewleta tirke hêrişê tesîs, depo, îstasyon, binawanî, dibistan û nêweşxaneyanê Rojawanî kena. La hetê bînî ra vera hêrişanê Îsraîlî wayîra Filîstînî vejîyena. Sey domananê Filîstînî domanê Rojawanî zî kişîyenê. 

Di rojdemê esasî yê Hemleya 'Abdullah Ocalanî rê Azadîye, Meseleya Kurdan rê Çareserîya Sîyasîye' est ê. Heta ke Rayber Apo azad nêbo meseleya kurdan nêna çareserkerdene û haştîye nêna Rojhelatê Mîyanênî. Ewro gerîlayanê azadîye têkoşînê seba azadîya Rayber Apoyî ard na safha. Gerîlayî her ca de vera hêrişanê dişmenî xoverdayîşêkê xurtî kenê. Rixmo ke dişmen çekanê qedexekerdeyan şuxilnena gerîlayî erkanê xo anê ca. Ganî ciwanê kurdî, tirkîyayîjî û enternasyonelî serkêşîya Hemleya 'Abdullah Ocalanî rê Azadîye, Meseleya Kurdan rê Çareserîya Sîyasîye' bikerê û çarçewa ney de verê xo bidê refanê gerîlayan. A raşte gerîlayî serkêşîya na hemle kenê û têkoşînî xeta Rayber Apoyî de geş kenê. 

Seba ke Rayber Apoyî xeta hîrêyîne ra tawîz nêdayo tecrîd wina yeno girankerdene. Ez pê bawer a ke serra 26. ya Komployê Mîyanneteweyîyî de Hemleya 'Abdullah Ocalanî rê Azadîye, Meseleya Kurdan rê Çareserîya Sîyasîye' do biresa armancê xo. Heta ke Rayber Apo azad bibo û meseleya kurdan çareser biba ganî têkoşîn bêro pîlkerdene.''