Mudirîya Zîndanan a Wezîrîya Edaletî ya Tirkîya cewabê xo yê seba muracatê wekîlanê DEM Partî de îdîa kerdbî ke Îmrali de qetî tecrîd çin o. Avûkatanê Buroyê Huqûqî yê Asrinî ra Îbrahîm Bîlmezî derheqê babete de ANFyî rê qisey kerd û pare kerd ke wezîrîye zûran kena.

Bîlmezî îfade kerd  ke Wezîrîye bi hawayêkê eşkerayî zûran kena û vat: ''Eke tecrîd çin o do cade wezîrîye eşkera bikera ke avûkatan çend reyî pêvînayîş kerdo. Xora îqtîdarê AKP-MHPyî 20 serran o bi zûran welatî îdare keno. La ma zî tim nê zûran eşkera kenê. Ma hîrê serrî yo nêeşkenê muwekîlanê xo yê Îmraliyî ra xeberêke bigêrê. Goreyê qanûnan muwekîlê ma Veysî Aktaşo ke 30 serrî yo zîndan de yo wa vera bidîyo. La Heyetê Îdare û Çimdarîye tehlîyeya ci serrêke taloq kerde. Na polîtîkaya vêşnayîşê înfazî dewamê tecrîdî yo.''

Bîlmezî vist vîrî ke eşkerayîya 'tecrîd çin a' ya Wezîrîya Edaletî ra verî muwekîlanê înan rê cezaya dîsîplînî ra qedexeyê pêvînayîşê keyeyan ê hîrê mengan dîyayo û vat: ''Nê cezayê dîsîplînî yê sîstematîkî vurîyayê metodêkê peydakerdişê tecrîdî. Nê cezayî qetî huqûqî nîyê. Bi nê hawayî pêvînayîşî yenê astengkerdene. La hetê bînî ra Wezîrîye seke bi komelî yarîyan kena vana Îmrali de  tecrîd çin a.''

Bîlmezî da zanayene ke bi rayîrê nê cezayanê dîsîplînî îqtîdar keno ke tecrîdî bi komelî bido qebulkerdene û vat: ''Îqtîdar nêwazeno vengê Birêz Ocalanî bireso teberî. Îqtîdar wazeno meseleya kurdan bi şer û şîdetî çareser bikero; coka Birêz Ocalanî tecrîd keno. La meseleya kurdan ganî bi dîyalogan bêra çareserkerdene. Seba ney zî ganî tecrîdê Îmraliyî bêro wedaritene.

Heta ke meseleya kurdan nêra çareserkerdene komel do rehet nêkero. Meseleya kurdan tesîrê pêro welatî keno. Seba ke prosesê dîyalogan dest pêbikero ganî muxalefet zî tecrîdî bikero rojdemê xo.''