Vervatoxê Komîsyonê Zîndanan ê Komeleya Huqûqnasan a Seba Azadîye (OHD) Zekî Bînbîrî derheqê kerdişanê zîndanan de ANFyî rê qisey kerd.

Bînbîrî ard ziwan ke bi destê Heyetê Îdare û Çimdarîye veradîyayîşê tepişteyan yeno astengkerdene û vat: ''Heyetê Îdare û Çimdarîye serra 2020î de ronîyayî û bi qanûnê înfazî erkê înan zêdîyayî. Heyetî bi sîstematîkî înfazê tepişteyan vêşnenê. Goreyê tesbîtanê komeleya ma heta nika înfazê 400 tepişteyan bi bahaneyan ameyê vêşnayene.''

Bînbîrî îfade kerd ke tepişteyan rê 'poşmanîye' yena ferzkerdene û vat: ''Na babete de îdareyê zîndanî tedayêka girane  kenê. Poşmanîye bi taybetî tepişteyanê sîyasîyanê ke 30 serrê xo temam kerdê rê yenê ferzkerdene. Seba ke tepişteyî poşmanîye qebul nêkenê hetê Heyetê Îdare û Çimdarîye ra vera nêdîyenê. La ganî na babete de bire aîda Mehkemeya Bingeyîne biba. Hetê bînî ra tepişteyê edlî yê sey Ogun Samastî bi bahaneya 'halê ci hol o' vera dîyenê. Heyetî bi hawayêkê cîyakerî nêzdîyê tepişteyanê sîyasîyan benê.''

Bînbîrî da zanayene ke ê tim babete teqîb kenê û vat: ''Goreyê belge û qeraranê ke resenê destê ma ma dest pê prosesê huqûqî û îtîrazî kenê. Nika Tirkîya de tepişteyê sîyasîyî binê hedefê binpaykerdişê heqanê merdiman de yê. Bi taybetî heqê cuye û weşîye yê tepişteyan yenê binpaykerdene. Tepişteyî seba cuya xo, xo ver danê. La meseleyê înan her ke şino benê giranêr.''