Avûkatê Baroyê Parisî François Devedjiyanî derheqê polîtîkayanê îşxalî yê dewleta tirke de ANFyî rê qisey kerd.

 Devedjiyanî da zanayene ke polîtîkayê îşxalî yê dewleta tirke binê serekîya Erdoganî de hîra bîyê û vat: ''Erdogan dewamê kulturê îşxal û nefretî yo. Polîtîkayanê înkar û îşxalê dewleta tirke seserra 20ine de tesîrê şaranê sey armenî, rûm, asûrî û kurdan kerd. Kurdî bi 35 mîlyonan însan ê. Xora heqê înan ê dewletbîyayîşî est o. La Tirkîya seke Qirkerdişê Armenîyan red kena estbîyayîşê kurdan zî  red kena. Dewleta tirke nê polîtîkayan de welatanê sey Azerbaycanî gêna xo kişte û kena ke sûcanê xo yê şerî meşrû bikera.''

François Devedjianî bale ante ser ke herêma Artsakhî de nameyê armenîyan ser o çîyêk nêmendo û vat: ''Artsakh herêmêka taybet a. Azerbaycanî bi destekê Tirkîya kontrolê pêro herême visto destî. A raşte Dîwanê edaletî yê Mîyanneteweyî bire dabî ke şarê armenî abigêro na herême la Azerbaycanî na bire binpay kerde.''

François Devedjianî ard ziwan ke seba şiknayîşê bêvengîya hêrişanê serê şarê kurdî û armenîyan ganî têkoşîn bêro pîlkerdene û vat: ''Ez pê bawer a ke her halî de ma do agêrê rayîrê haştîye ser. Şert o ke ma bi huqûq, heqdarî û eqlê xo bawer bikerê. Şinasnayîşê Qirkerdişê Armenîyan hinî hetê her kesî ra yeno qebulkerdene. Çunke wexto ke zanayîş û qilî vejîyenê vernî her çî aver şino.''