Wina pawîyeno ke Tirkîya êlule de do cewab bida Komîteya Wezîran a Konseya Ewropa. Nê prosesî de çira Komîteya Vergirewtişê Îşkenceyî (CPT) çira reyna nêşina girawa Îmraliyî? Gelo tek rayîr prosesê verê Komîteya Wezîran o?

Avûkatanê Rayberê Şarê Kurdî Abdullah Ocalanî ra Ozgur Erolî prosesê bira Ocalan-2yî yê Mehkemeya Heqanê Merdiman a Ewropa (MHME) de çi gamî erzîyayê ANFyî rê qisey kerd.

Erolî vist vîrî ke 2014 de MHME cezaya muebede ya girankerde sey kerdişê vera merdimîye pênase kerdo û bire daya ke na ceza Peymana Heqanê Merdiman a Ewropa (PMME) binpay kena. Erolî vat: ''Tirkîya de seba vurnayîşê na rewşe gamêke nêerzîyaye. Rixmê ney zî Komîteya Wezîran a Konseya Ewropa ke ganî caardişê biranê MHME kontrol bikerdêne wezîfeyê xo nêard ca. Coka par Heyetê Wezîran rayêke na mesele arde rojdem û serrêke wext da Tirkîya. Nika no wext ho qedîyeno. Ma cewabo ke Tirkîya do êlule de bida texmîn kenê. Seba ke Tirkîya qet yew xîret û sereraştişêk nêkerdo do vajo 'ma felan çi kerd' yan zî 'ma hê kenê.' Beno ke Tirkîya tay vurîyayîşê serê înfazî bimojnê.''

Avûkat Ozgur Erolî vist vîrî ke CPT wextêkê dergî ra nata nêşîyo Înrali û vat: ''Komîteya Wezîran û MHME raporanê CPTyî kenê referans. Coka tesbîtê CPTyî girîng ê. CPTyî verî derheqê Îmraliyî de tesbîtê girîngî kerdbî. La nika asta globale de yew krîz est o. Nê krîzî ra nêzbîyayîşê înan ê vera kurdan vurîyayo. CPT û MHME kenê ke raştîya Îmraliyî ra biremê, xo nêzdîyê meseleyan nêkerê. CPT qestî ra nêşino Îmrali. Tewr peyên 2019 de înan wextê rojeyê mergî de tay pêvînayîşî bi avûkatan kerdbî.''

Erolî da zanayene ke CPT seba tesîrkerdişê huqûqî rayîrêk o la ganî ê mekanîzmayanê cîyayan ê mîyanneteweyîyan zî bişuxilnê. Erolî vat: ''Mekanîzmaya sereke zî mekanîzmayê NYyî yê. Ma muracatê înan kerd. Ma bi fermî zî menga vîyarte de muracatê înan kerd. Ma nika netîce pawenê.''