Buroyê Huqûqî yê Asrinî derheqê pêvînayîşê keyeyan ê bi Girawa Îmraliyî de eşkerayîyêke daye. 

Eşkerayîya Buroyê Huqûqî yê Asrinî wina ya:

''Muwekîlê ma Birêz Abdullah Ocalan, Birêz Omer Hayrî Konar û Birêz Veysî Aktaş ê ke Girawa Îmraliyî de yenê tepiştene 3ê adara 2020î de keyeyanê xo reyde pêvînayîş kerd. No pêvînayîş netîceya hîsgerîye û nêrazîbîyayîşanê şarê kurdî û rayaumûmîya demokratîke yê vera şewatê Îmraliyî ame kerdene.

Keyeyan zîyaretê xo yê Girawa Îmraliyî de teyît kerd ke girawe de şewat vejîyabi. Goreyê vînayîşanê keyeyan muwekîlê ma baş asenê, rewşa weşîya înan baş a û şewatî înan rê tesîr nêkerdo.

La caardişê tecrîdê Zîndanê Îmraliyî  keyeyê tepişteyan û rayaumûmîye qerqilneno. Heqo bingeyîn ê tepişteyan o ke keye û avûkatanê xo reyde pêvînayîş bikerê. La no heq tewr Zîndanê Îmraliyî de bi hawayêkê huqûqî nêame caardene û tim sey metodêkê şantajî û gefî ame xebitnayene. Ewro zî ame dîyene ke serra 2011î ra nata no heq têna netîceya grevê vêşanîye, şewatî ûsn de ame caardene. Hetê huqûqî ra zî hetê exlaqî ra zî na rewşe nêna qebulkerdene.

Ma pê zana ke rewşa weşîye ya Birêz Ocalanî baş a û Birêz Ocalan bihêz û bimoral o. Birêz Ocalan pêvînayîşê bi birayê xo Mehmet Ocalanî de bi hawayêkê pîtî reyna ard ziwan ke o seba krîzê Tirkîya û Rojhelatê Mîyanênî  wayîrê hêzê çareserîyan o. Birêz Ocalanî tewirê xo yê pêvînayîşanê serra 2019î hîna bihêzêr vet werte. Prosesê peyênî de zaf serebûtî qewimîyayî û nê mojna ke Birêz Ocalan heqdar o û nê atmosferî de tecrîdê vera ey heman wextî de tecrîdê vera ameyoxê şaran o.

Ma veng danê ke cade tecrîd bêro wedaritene ke no tecrîd bêhuqûqî yo û vera îradeyê şaran ê waştişê cuya hemparî yo. ''