25ê adara 2021î ra nata Rayberê Şarê Kurdî Abdullah Ocalanî, Omer Hayrî Konar, Hamîlî Yildirim û Veysî Aktaşî ra xebere nêna girewtene ke Îmrali de tepişîyenê.

Goreyê xebera Ajansê Mezopotamya Buroyê Huqûqî yê Asrinî vera tecrîdê giranî yê serê Rayberê Şarê Kurdî Abdullah Ocalanî muracatê Komîteya Vergirewtişê Îşkenceyî ya Ewropa (CPT)kerd û vat: ''Cade bi lezî şorê Îmrali.''

Avûkatatan waştişnameyê muracatî de îfade kerd ke seba ke ê çarçewa huqûqî de muwekîlanê xo de pêvînayîş bikerê zaf reyî muracat kerdî la muracatê înan bênetîce mendî. Muracat de ame parekerdene ke serra 2021î de seba pêvînayîşê keyeyan 71 reyî muracatî ameyî kerdene û seba ê avûkatab zî 202 reyî muracatî ameyî kerdene la reyna zî destûrê pêvînayîşî nêame dayene. Buroyî vat: ''Xeylêk reyî muracatê Mehkemeya Înfazî ya Bursa, Wezîrîya Edaletî, Komîsyonê Heqanê Merdiman ê Meclîsî û Mehkemeya Qanûnê Bingeyî ame kerdene la nê muracatan ra netîceyêke nêvejîyaye.''

Muracat de heqê xebernegirewtişî sey "Incommunicado" ame pênasekerdene û ame vatene ke nê şertanê giranan mîyan de dewam keno.  Muracat de ame îfadekerdene ke mekanîzmayê pêvînayîşî ameyî astengkerdene û no sey metodê îşkenceyî û binpaykerdişê heqan çetin o.

Muracat de ame vatene ke 11 serran de 5 pêvînayîşê avûkatan ameyî kerdene û 7ê tebaxa 2019î ra nata pêvînayîşê avûkatan û 3ê adara 2020î ra nata zî pêvînayîşê keyeyan nêameyo kerdene. Dîya zanayene ke muracatê 30ê adare-22ê teşrîna peyêne ya 2021î zî bi bahaneya cezayanê dîsîplînî û cezayanê qedexeyê pêvînayîşî ameyî redkerdene.

Muracat de ame vatene ke ganî cade CPT Îmrali zîyaret bikero û rewşa peyêne ra agahdar bikero.

Avûkatan dewamê muracatî de nê waştişî rêze kerdî:

''-Ganî CPT cade şoro Îmrali.

-Cade pêvînayîşê avûkatan bêro kerdene û nê pêvînayîşî bibê mende

-Ganî cade keyeyî û wasî pêvînayîşî bikerê û nê pêvînayîşî tim bêrê kerdene, peynîya cezaya dîsîplînî bêra ardene.

-Ganî heqê pêvînayîşê telefonî bi hawayêkê rûtînî bêrê dayene.

-Astengîyê vera hacetanê têkilîye yê sey faks û mektube wa wedarîyê.

-Astengîyê dayîşê rojname, kovare û kitaban wa biqedê.

-Tedbîr û prosedûrê seba qedînayîşê îşkence û kerdişanê xiraban wa bêrê girewtene.''