Goreyê xebera Ajansê Mezopotamya Buroyê Huqûqî yê Asrinî vera tecrîdkerdişê Rayberê Şarê Kurdî Abdullah Ocalanî muracatê CPTyî kerd. Muracat de ame vatene ke menganê adar, hezîrane, nîsane, gulane de zî qedexeyê pêvînayîşan dewam kerd.

Avûkatanê Rayberê Şarê Kurdî Abdullah Ocalanî, Hamîlî Yildirim, Omer Hayrî Konar û Veysî Aktaşî da zanayene ke cewab nêdîyeno muracatê înan ê seba pêvînayîşî û avûkatan waşt ke ganî cade tecrîd wedarîyo. Avûkatan eşkera kerd ke 4 mengan de înan 68 reyî muracat kerd, keyeyanê muwekîlanê înan zî 20 reyî muracatê pêvînayîşî kerd. 

Muracatê CPTyî de wina ame vatene: ''Qedexeyê pêvînayîşî yo ke pratîk de bi hawayêkê îlegalî yeno caardene, dewam keno.  7ê tebaxa 2019î ra nata avûkatî, 3ê adara 2020î ra nata zî keyeyî nêeşkenê pêvînayîş bikerê. Serdozgerîya Komare ya Bursa cewabê muracatan nêdana. Coka ma muracatê Mehkemeya Înfaazî ya Bursa kerd. Mektubê ma nêdîyenê muwekîlan. Ma venga CPTyî danê ke wa erk û mesuldarîyanê xo vera na rewşe bîyarê ca.

-Wa komîte cade Girawa Îmraliyî zîyaret bikera

-Wa avûkatî bieşkê muwekîlanê xo bivînê

-Keye û wasîyî wa bi hawayêkê nîzamî tepişteyan bivînê û cezayê dîsîplînî yê bêhuqûqî biqedê.

-Heqê pêvînayîşî reyde heqê telefonî zî wa bêro caardene.

-Sey mektube û faksî peynîya astengkerdişê cîhazanê têkilîye bêra ardene.

-Astengkerdişê wendişê rojname, kovare û kitaban wa bêro wedaritene.

-Semedo ke peynîya kerdişan ê xiraban, bêmerdimîye û îşkenceyî bêra ardene tedbîrê xurtî wa bêrê girewtene.''