Wekîlê HDPyî yê Çewlîgî Erdal Aydemîrî Meclîs de ard rojdem ke Îdareyo Taybet ê Çewlîgî wezîfedarkerdişê karkeran de bêusûlîye keno û waşt ke na bêusûlîye bêra cigêrayene.

Aydemîrî derheqê babete de vernîyazêkê persan da û Meclîs de  vat: ''Îdareyo Taybet ê Çewlîgî hem bi bêusûlîye karkeran gêno kar hem zî nê kesî wesayîtanê îdareyî seke wesayîtê înan ê şexsî yê şuxilnenê. Goreyê îdîayanê ke resayê ma nê kesê ke bi bêusûlîye gêrîyayî karî, pereyê sotemenê wesayîtan zî îdareyî rê birnenê. Ganî Îdareyo Taybet ê Çewlîgî cade bigêrîyo binê tehqîqatî û derheqê nê îdîayan de rayaumûmîye bêra agahdarkerdene.''

Aydemîrî vernîyaz de nê persî pers kerdî;

-Derheqê bêusûlîyanê Îdareyê Taybetî de tehqîqatêk do bêro kerdene?

-Derheqê nê karkeran de agahîyî do bêrê dayene?

-Raşt o ke plakayê wesayîtanê îdareyî yenê vurnayene? Derheqê ney de tehqîqatêk do bêro kerdene?

-Wesayîtê fermî yê îdareyî hetê kamyew kesan ra şuxilîyenê? Derheqê nê kesan de tehqîqatêk do bêro kerdene?