Başûrde PDK, Vakur de bi destê AKPyî vera kurdan polîtîkayê şerî yê leyminî yenê rayraberdene. Wekîla DEM Partî Salîha Aydenîz babete ANFyî rê erjna.

Salîha Aydenîz nê vatî: '' Hêrişanê zereyê sînorê Başûrî de yê ke nê serranê peyênan de bişîdetî dewam kenê û tede çekê kîmyewî zî yenê şuxulnayêne,  heta nika  xeylêk kurdî ameyî qetilkerdene. Hêrişî hema zî dewam kenê û îdareyê PDKyî zî hetê îstîxbarat û lojîstîkî ra paştî dano Tirkîya. Seba ke PDK eşkera paştî dano polîtîkayanê dişmenîye, şarê kurdî zaf qehrîyeno. Hukmatê Iraqî zî vera hêrişan bêveng o hêrişan rê çimanê xo geno. PDK semedê hedefanê xo yê dewrê kilmî destkewteyanê Başûrî erzeno tehluke. Başûr de bi droneyanê çekdaran û netîceya suîkastî de xeylêk kurdî ameyî qetilkerdene. Mîyanê înan de rojnameger Nagihane, Hero û Gulîstane zî est ê. 

Vakur de îqtîdarê AKP-MHPyî bi heme hêzê xo hêrişê kurdan keno. Îqtîdarê ke TRT Şeş sey metodêkê asîmîlasyonî akerd îdîa keno ke polîtîkaya înkarî ya vera ziwanê û kulturê kurdan wedarita la no raşt nîyo. Kesê ke kurdkî qisey kenê yenê hedefgirewtene, veyveyê kurdan yenê sereştene û vera kurdan hêrişo sîstematîk est o. No hêrişê vera estbîyayîşê kurdan o.  Vera kultur û ziwanê kurdan polîtîkaya asîmîlasyonî yena rayraberdene. Ganî şarê kurdî vera nê hêrişan bibo yew.Ziwanê dayîke û kultur sebebê estbîyayîşê şarêkî yê û erjê tewr muhîm ê ke ganî bêrê pawitene. Coka ganî kurdî semedê wayîrvejîyayîşê ziwan û kulturê xo her hetî ra gamanê pêtan bierzê. Ganî kanalê kurdkî û bi kulturê ma weşan kenê bêrê seyrkerdene, rojnameyê kurdkî bêrê wendene, projeyê kurdkî yê îdareyanê herêmî hetê şarî ra bêrê wayîrvejîyayene û dezgehê sey Zarokîstanî ke domanî tede perwerdeyê kurdkî genê, zafêr bê.

Hetê bînî ra tecrîdê serê Birêz Abdullah ocalanî verê çareserî de astengo tewr pîl o. Bi tecrîdî yeno waştene ke wa meseleya kurdan mero çareserkerdene û faşîzîm bibo mende. No tecrîd têna vera heqanê şexsîyan ê Birêz Ocalanî nê, eynî wextî de heqanê şarê kurdî hêrişêko sîstematîk o.Coka wedartişê tecrîdî û waştişê azadîya fîzîkîye ya Birêz Ocalanî ganî merkezê têkoşînê polîtîkî yê şarê kurdî de cayê xo bîgêro. Tecrîd heme waranê sey ziwan, kultur, cuye, ekonomî, xoza, cinî û ciwanîye de verê waştişê azadîye de sey dêsêkî vindeno. Ganî Kurdîstan û Tirkîya de heme şarî û hetê demokratîkî vera tecrîdî têkoşînê hemparî rayra berê. Ganî şarê kurdî vera nê hêrişan de têkoşîn û paştîdayîşê xo xurtêr bikero.''