Amedspor peynîyê hewteyî de deplasmanê Bursaspor de raştê hêrişê nîjadaperetî yê organîzkerdeyî amebi. Amedsporo ke agêra Amedî, warê teyarayan de bi hezaran kesî şîyî vera ci.

Hemserekê DBPyî yê Amedî Harettîn Altun, Hemserekê HDPyî yê  Amedî Zeyyat Ceylan û Gulîstene Atasoy, Wekîla HDPyî ya Amedî Remzîye Tosun û Dersime Dag û temsîlkarê komelê sîvîlî zî şîyî vera qefleyê Amedsporî.

Amedijan pê def û zurna govende girewte, deyîra “Diren ha Diyarbekir diren / Xover bidê Amed” vate û pê slogana ''Amed pê şima sereberz o'' qîrayî. Qefleyî bi hezaran wesayîtan sey konvoyî verê xo da Tesîsanê Şeymus Ozerî.

Hetê bînî ra  Komeleya Paştgêran a Amedsporî derheqê hêrişê nîjadperestî de eşkerayîye daye û vat ê do çirey peyser game meerzê.

Eşkerayîye de nê ameyî vatene: ''Paştgêranê Bursasporî posterê wesayîtê bi modelê Torosî ke qirkerdişanê ke kiştoxê ci nimiteyî yê serranê 90yan ke vera sîvîlanê masûman ameyêne kerdene de ameyêne şuxulnayene û  kiştoxê JÎTEMî Mahmet Yildirim bi nameyê bînî Yeşîl, akerdî û sloganê nîjadperestî vatî. Rixmo ke dekewtişê stadyumî de asayîşê polîsan estbi, nê posterî kewtî zere. Eşkerayo ke nînan rê çim ameyo girewtene.''

Komele waşt wa hêrişkarî cade vejîyê meydan û bêrê muhakemekerdene û vat: ''Nê hêrişê nîjadperest û xirabî şexsê Amedsporî de şarê  Amedî rê ameyî kerdene. Şarê ma yo ke bi serran o vera hetanê xorî û leymin ê dewlete xover dano, vera heme qirkerdiş, zext û polîtîkayanê asîmîlasyonî têkoşîno tarîxî dayo û tewiro birumet mojnayo. Êyê ke peyê kiştoxanê JÎTEMî ra wazenê mesaj bidê şarê ma, wa agêrê biewnîyê têkoşînê tarîxî yê Zîndanê Amedî ra. No şar do çirey ne vera kiştoxanê bipere yê JÎTEMî ne zî vera kayanê leyminan ê dewlete  têkoşînê xo yê birumetî ra peyde game bierzo.''