8 serrî verî Sakîne Cansiz, Leyla Şaylemez û Fîdane Dogan paytextê Fransa Paris de ameybî qetilkerdene. Têgêrayîşê azadîye yê Kurdîstanî, keyeyê 3 cinîyan, şarê kurdî û dostê înan seba caardişê edeletî têkoşînê xo dewam kenê.

Çarçewa tehqîqatê neweyî de mehkeme 20ê gulane de keyeyanê Sakîne, Leyla û Fîdane reyde qisey kerd. Dadgerî keyeyan rê vat ke semedo ke dosya ser o bira 'sirê dewlete' esra hema gamêke nêerzîyaye.

Komelê Demokratîkî yê Kurdan ê Fransa (CDK-F) derheqê babete de pê beşdarîya Remi Fraund, Serekê Koemleya France-Kurdîstanî û Komeleya Dostanîya bi Kurdan vizêr Zoomî ser o panelêk kerd.

Beşdarê panelî Agît Polat, Sylvie Jan, Andre Metayer, Remi Feraud û parêzer Jean Louis Malterre, rojnameger Christophe Ayadî prosesê huqûqî yê 8 serrî, rolê servîsanê nimiteyan ê Tirkîya ser o qisey kerd û îfade kerd ke bira nimite ya bi nameyê 'sirê dewlete' verê edaletî de asteng a. 

Sylive Jana ke moderatorîya panelî zî kerda vist vîrî ke no qirkerdiş seba Fransa şerm o û têkoşînê înan ê edaletî rixmê zor û zehmetîyan zî dewam keno.

Dima Malterreyî qisey kerd û bale ante ser ke dosyaya mergê Omer Guneyî zî ameye qefilnayene. Maltereyî vat: ''Avûkatan serra 2018î de reyna gerreyê qirkerdişî kerd û 2019 de tehqîqato newe dîya destpêkerdene. Dadgerê dewa waşt ke Wezaretê Pawitişî û Wezaretê Karanê Zereyî agahîyanê verê destê xo pare bikerê la Wezaretê Pawitişî bi bahaneya 'sirê dewlete' no qebul nêkerd, Wezaretê Karanê Zereyî zî cewab nêda. Derheqê dokumenteranê bi morê MÎTî ser o dadgerî nê wezaretan ra agahîye waşte la reyna agahîye nêdîyaye. Reyna Fransa ra şîyayîşê Sersefîrê tirkî Îsmaîl Musa Hakki tesadûfî nîyo.  Wextê qirkerdişî de no camêrd nameyo diyîn ê MÎTî bi. Coka ganî bêro goşdarîkerdene.''

Vervatoxê Têkilîyanê Teberî yê CDK-Fyî Agît Polatî vat: ''Werteyê Parisî de 3 cinîyê kurdî ameyî qetilkerdene. Ma vînenê ke prosesê edaletî hetê Tirkîya ra yeno blokekerdene. Heta ke no qirkerdiş nêro muhakemekerdene verê îstîxbaratê Tirkîya yê Ewropa nêno girewtene. Nêbeno ke na dewa seba menfaatanê polîtîkan bişuxilîya. Wedaritişê bira nimite do mesuldarîya Fransa zî biqedîno.''

Remi Feraudo ke wextê qirkerdişî de Şaredarê Parisî bi vat: ''Ma seba roşnîkerdişê dewa hema xîret kenê. Ez do newe ra Wezaretê Edaletî ra bipersa ke 'Gelo mehkeme eşkena dosya ra bira 'sirê dewlete' wedarna yan nê.' Seba ke selahîyetdarî têbigêrê ez do xîret bikera.''

Serekê Komeleya Dostanîya bi Kurdan a Bretagne Andre Metayerî vat: ''Ma zanenê ke kamyew hêzî peyê nê qirkerdişî de yê. Ganî bira nimite bêra wedaritene. Nê qirkerdişî de rolê MÎTî esto. Roşnîkerdişê na dewa seba welatê ma girîng o.''

Rojnameger Christophe Ayado ke hewteyê vîyarteyî de babete ser o rojnameyê Le Monde rê xeberêke amade kerdbi vat: ''Goreyê têkilîyanê Fransa û Tirkîya kurdan rê operasyonî yenê kerdene. Êyê ke kişîyayî cinîyê kurdî bîyî. Cinîyê kurdî têkoşînê vera DAÎŞî de tewr vernî de bibî. Ganî dosya ser o na bira nimite bêra wedaritene û agahîyê dosya bêrê vilakerdene.''

Goşdaranê panelî ra Serekê verênî yê Koma Çepe ya Parlamentoya Ewropa Francis Wurtzî zî îfade kerd ke pê vistişê PKKyî 'lîsteya terorî' Ewropa de kurdan rê xeylêk tedayî yenê ferzkerdene.

Peynîya panelî de ame parekerdene ke têkoşînê raştîye û edaletî do bêmabên dewam bikero.