Hemserekê Pêroyî yê Partîya Têdûştîye û Demokrasîyî ya Şaran (HEDEP) Tuncer Bakirhanî Kombîyayîşê Grûba Meclîsî de rojdem ercna.

Bakirhanî vîst vîrî ke tarîxê komare ra sere de kurd û elewîyî heme grûbê enîk û bawerîye raştê înkr  û îmhayî ameyî û ame cehdkerdene ke bêrê asîmîlekerdene û vat, “Nê semedî ra heme welatî de şer û dej qewimîya. Derbeyî ameyî kerdene,qirkerdişî ameyî kerdene. Ziwan û nasnameyê kurdan ameyî înkarkerdene. Dewê kurdan ameyî vêşnayene, wareyî ameyî qedexekerdene. Kurdî erzîyayî zîndanan, ameyî surgunkerdene. Butçeyê şarî semedê şerî ameyî şuxulnayene. Ma na seserre de komarêke xo dima verda ke demokrasîyî ra zaf dûr a.

Meseleya kurdan seserre ya ke bêçare ya. No îqtîdar destkewteyanê kurdan rê tehemul nêkeno. Seba ke verê haştîye û demokrasîyî bigêro Îmrali de qanûnan binpay keno û tecrîd ano ca. Tecrîd yeno manaya zafêr pêrodayîş, merg, feqîrîye. Ma soz danê ke seba ke tecrîd bêro qedînayene, çîyo ke destê ma ra bêro ma do bikerê. Ma na seserre rixmê heme zehmetîyan xo verda, ma do xoverdayîşî rê dewam bikerê. Heta meseleya kurdan çareser mebo meseleyê bînî çareser nêbenê.

Seba ke karê ke rayîr de nîyê bêrê nimitene Tirkîya de mîgîngê Gazze ame kerdene. Seba ke dahîna rehet hêrişê Rojawan bikerê û komelê Tirkîya bîgêrê peyê xo, verê krîzanê zafhetan bîgêrê, vêşanîye û feqîrîye bimnê mîtîngê Gazze ame kerdene. No îqîtdar tim xo rê yew dişmeno viraşte afirneno ke rayîrê xo rê dewam bikero. Ma zaf hole zanê ke êyê ke Îsraîl sey dewleta terorî name kenê eslê xo de tira zaf nêzdî yê. Bi doneyanê TUIKî zî yeno vînayene ke Tirkîya û Îsraîlî senî pîya tîcaret kerdo. Filistin xeymê înan de nîyo. Çunke 20 serranê peyênan de tîcaretê mabênê Tirkîya û Îsraîlî zaf zêdîya yo. ”