DEM Partî Anqara de bînaya xo ya merkezî de derheqê weçînayîşanê herêmîyan de kombîyayîşê hemserekanê şaristanan kena.  Kombîyayîşî ra verî Hemserekê Pêroyî yê DEM Partî Tuncer Bakirhanî qisey kerd.

Bakirhanî bale ante hêrişanê Îsraîlî yê vera Gazze ser û pare kerd ke Îsraîl Gazze de ho qirkerdiş keno. Bakirhanî vat: ''Îsraîl bi eşkera Gazze îşxal keno. Wina aseno ke Rojhelatê Mîyanênî de şerî do giranêr bibê. Tirkîya zî na rewşe de tewirêkê winayênî mojnena ke şerî teşwîq kena. Seke ameyo îtîrafkerdene ke Tirkîya parçeyê çekan şawitê Îsraîlî.''

Bakirhanî vist vîrî ke Sereka ÎYÎ Partî Merale Akşener seba faîlanê meçhulan ê serranê 90an vatbî 'sey camêrdan ameyêne kerdene' û vat: ''Çîyo sey 'cînayetê raştî' çin o. Ganî Akşenere nê qiseyanê xo ra bêra muhakemekerdene.''

Bakirhanî vat: ''Meaşo asgarî ame kerdene 17 hezar û 2 lîra. La no meaş binê sînorê feqîrîye de yo. Tirkîya hînî bîya welatê kartanê kredî. Merdimî nêeşkenê debara xo bikerê. Ciwanê tezeyî krîzê ekonomîkî ra xo kişenê.

Ma sey DEM Partî verweçînayîşê xo qedînayî. Ma no metod reya verêne ceribna la bi serkewtişî ard ca. Wextê nê verweçînayîşanê ma yê demokratîkan de îqtîdarî zî hîleyan rê dewam kerd. Îqtîdarî şaristanan de leşkerî sey weçînitoxî mojnayî. Heyf ke muxalefet zî ney rê vengê xo nêkeno. Teyna ma vera hîleyanê winayênan vengê xo vejenê. Na babete de erkê pîlî kewenê embazanê ma yê hemserekan ser. Ma do şarî rê bi zelalî qala weçînayîşan bikerê. 

Xeylêk dezgehê ma seba azadîya Birêz Ocalanî û wedaritişê tecrîdî mabênê 1-15ê sibate de rayraşîyayîşêkî do bikerê. Ma zî sey DEM Partî paştî danê nê rayraşîyayîşî. Tecrîd meseleyan çareser nêkeno, eqsê ci giranêr keno. Ganî meseleya kurdan zî bi rayîrê dîyalog û muzakereyan çareser biba. Seba ney zî ganî tecrîd bêro wedaritene.''