Keyeyê xoverdayoxanê girewteyan seba ke paştdayîş bidê domananê xo û bale biancê serê çalakîya înan a vera tecrîdî, çalakîya xo ya nobete dewam kenê. Keyeyî her roje bi hawayêkê sîstematîkî hetê polîsan ra yenê astengkerdene labelê keyeyî bi qerardarîye çalakîya xo rê dewam kenê.

No Yewşeme keyeyan reyêka bîne waşt şorê vernîya Hepisxaneyê Bakirkoyî û çalakîya xo ya roniştişî dewam bikerê. Parlamenterê HDP’yî Hasan Ozguneş, Saruhan Oluç û Zuleyha Gulume û xeylî hemwelatijan zî paştdayîş da çalakîya keyeyan.

Labelê reyna polîsanê Tirkî vernîya rayraşîyayîşî birnaye û nêverda keyeyî şorê vernîya Hepisxaneyê Bakirkoyî.  Dimayê tehdîtanê polîsanê Tirkî yê hêrişkaran, dayîkan ard vîrî ke ewro roja dayîkan a û ê wazenê qerenfîlan vernîya hepisxaneyî de binê ro. Labelê polîsan destûr nêda keyeyan. Naye ser o, keyeyê agêrayî banê HDP’yî yê Bahçelîevlerî.

Tîya de Hemserêka HDP’yî ya bajarî Esengul Demîre eşkerayîya çapemenîye daye û vat, “Şertanê normalan de roja dayîkan de domanî şonê leyê dayîkanê xo labelê nika dayîkî şonê serdana domananê xo.”

Parlamenterê HDP’yî Hasan Ozguneşî zî qisey kerd û bale ante serê tecrîdê serê Ocalanî û vat, “Bi tecrîdkerdişê birêz Ocalanî, teyna o ney, heme şarê Tirkîya û hêzê demokrasî binê tecrîdî de yê.”

Dayîkanê Aşitîye zî vengdayîş bi her kesî kerd û vat, “Wa her kes destê xo bino wijdanê xo ser. Wa her kes vengê ma biheşno û ma reyde vengê xo berz bikero.”