Keyeyê tepişteyanê ke domanê înan vera tecrîdî grevê vêşanîye û rojeyê mergî de yê reyêka bîne şîyî vernîya Hepisxaneyê Bakirkoyî. Keyeyî rixmê hêriş û astengkerdişê polîsan zî bi slogananê xoverdayîşî rayra şîyî.
Keyeyê ke domanê înan vera tecrîdê serê Rayberê Şarê Kurdî Kurdî Abdullah Ocalanî grevê vêşanîye û rojeyê mergî de yê, reyêka bîne şîyî vernîya Hepisxaneyê Bakirkoyî. Çalakîye de avûkatê Komeleya Huqûnasanê Azadan (OHD), hemverxatoxa Kongreya Şaran a Demokratîke (HDK) Gulîstan Kiliç Koçyîgîte û û Wekîla Partîya Şaran a Demokratîke (HDP) Zuleyha Gulume zî amade bîyî.
Nêverda ke fotografê qerarî bêro antene
Keyeyî kaleka oto-rayîrê E-5'î de ameyî têhet û bi slogana, 'Biciwîyo xoverdayîşê zîndanan'' ver bi hepisxaneyî rayra şîyî. Nêzdîyê hepisxaneyî de polîsanê Tirkî vernîya keyeyan birna, vat çalakîye qedexe ya û qerarê qedexekerdişî da avûkat û wekîlan. Avûkatan vat qerar bêûsul o û waşt fotografê qerarî biancê la polîsan destûr nêda.
Şima çi bikerê zî ma do siba tîya de bibê
Wextê munaqeşeyan de keyeyan dest bi çalakîya roniştişî kerde. Polîsan hêriş bi keyeyan kerd. Keyeyanê tepişteyan vat, ''Şima çi bikerê zî ma do siba tîya de bibê.”Keyeyî bi slogananê ''Ma do bi xoverdayîşî ser bikewê'', ''Ma verê zextan de sere nêna ro'' ver bi Meydanê Şîrînevlerî rayra şîyî. Xeylî kesan bi çepikan paştdayîş da keyeyan.
