Şubeyê Îstanbulî yê Komeleya Huqûqnasanê Seba Azadîye (OHD) seba dosyaya cenazayanê ke Goristanê Xerzanî ra ameybî vetene û Goristanê Kîlyosî de ameybî definkerdene, muracatê Mehkemeya Heqanê Merdiman a Ewropa kerd.

Goristanê Xerzanî yê dewa Oleka Jore yê Bedlîsî amebi rijnayene, tira 300 cenazayan ra 265 cenazayî ameybî vetene û kişta rayîrê Goristanê Kîlyosî de ameybî binerdkerdene.

Goreyê xebera Jinnewsî keyeyan bi rayîrê avûkatanê xo sûcanê 'vîrameyîşî rê heqaret', 'îşkence û ezîyet' ra Serdozgerîya Komare ya Îstanbulî de gerre kerd la dozgerîye destûrê tehqîqatî nêdayo. Heman wextî de keyeyan muracatê Mehkemeya Qanûnê Bingeyî zî kerdbi la tira netîce nêamebî girewtene.

Avûkayanê OHDyî naye ser o muracatê Mehkemeya Heqanê Merdiman a Ewropa kerd. Muracat de qala madeya 8. ya Peymana Heqanê Merdiman a Ewropa kerd ke na made qala 'cuya taybete û keyeyî rê hûrmet' kena. Seba ke tehqîqatê dosyayan zî hol nêame kerdene zî muracat ame kerdene.