Wekîla HEDEPî ya Colemêrgî Oznure Bartin derheqê tecrîdê vera Rayberê Şarê Kurdî Abdullah Ocalanî de ANFyî rê qisey kerd.

Oznure Bartin bale ante ser ke qedexeyê pêvînayîşê bi Ocalanî tercîhê şerî yê îqtîdarî yo. Oznure Bartin vat: ''33 mengî yo Birêz Ocalanî ra xeberêke nêna girewtene. Tecrîdê Îmraliyî beno sebebê krîzan û no tecrîd yeno manaya xorinbîyayîşê dej, şer, kişîyayîşan. Tecrîdê Îmraliyî çaresernêkerdişê meseleya kurdan ra cîya nîyo. Birêz Ocalan seke ey bi xo vatbi eşkeno meseleya kurdan çareser bikero. Eke bêro waştene ke tecrîdê Îmraliyî bêro wedaritene ganî hêverî tecrîd bêro wedaritene.

Ewrto tecrîdê Îmraliyî vilayê pêro welatî bîyo. Îqtîdarê AKP-MHPyî dişmenîya kurdan keno û hêrişê destkewteyanê kurdan keno. Hêzê ke xo sey muxalîfan pênase kenê wexto ke babete yena kurdan ser bêveng manenê. Coka ma eşkenê vajê xo pêro komel binê tecrîdî de yo. Meseleya kurdan 100 serrî yo pabeyê çareserîye ya. Na mesele bi israrê şerî nêna çareserkerdene.''

Wekîle Oznure Bartin vist vîrî ke tepişteyê sîyasîyî seba çareserîya meseleya kurdan û seba wedarîyayîşê tecrîdê Îmraliyî grevê vêşanîye de yê û vat: ''Kurdî wazenê ke heqê înan bi Qanûnê Bingeyî bêrê pawitene. Grevê vêşanîye yê tepişteyan dewamê xeta têkoşînî yo. Ma venga îqtîdarî danê ke wa waştişanê tepişteyan cade bîyaro ca. Ganî Birêz Ocalanî de cade pêvînayîş bêro kerdene û meseleya kurdan bi rayîranê demokrasî bêra çareserkerdene. Nînan ra ber polîtîkayêka bîne hetê ma ra nêna qebulkerdene.''