Şaristanê Baselî yê Swîsre de vizêr çarçewa Hemleya 'Abdullah Ocalanî rê Azadîye, Meseleya Kurdan rê Çareserîya Sîyasîye' de aktîvîstanê kurd, swîsreyîj, katalan, uruguayîj, fransiz û kenyayîjan ra Merkezê Komelê Demokratîkî yê Kurdan de çalakîya nobete daye destpêkerdene.

Çalakîye do her çarşemeyî hetê Komîteya Abdullah Ocalanî rê Azadîye ra bêra kerdene. Çalakîye de kitabê Abdullah Ocalanî bidê şinasnayene, fîlmî do bêrê mojnayene û kombîyayîşê şarî do bêrê kerdene.

Endama Kongreya Neteweyî ya Kurdîstanî (KNK) Alî Maturî çalakîye de dîyar kerd ke ê çalakîya xo temamîya Swîsre rê vila bikerê. Maturî venga kurdîstanijan, cinî û ciwananê kurdan da ke wayîrê hemle vejîyê.

Hetê bînî ra Yewîya Cinîyan ê Kurdan a Swîsre (YJK-S) şaristananê Aarau, Luzern û Zurichî de zî derheqê tecrîdî de dezgehan de pêvînayîşî kerdî û dosyayê serê tecrîdî dayî selahîyetdaranê dezgehan.