Hemserekê Konseya Rayberdişî yê KCKyî Cemil Bayikî Programê Taybetî yê Stêrk TVyî de rojdem ercna. Qiseykerdişê Bayikî ra qismêk wina yo:

''Ez sere de wazena nê vajî. Vakurkê Kurdîstanî û Tirkîya de nuştox, hunermend û hetê ke vera faşîzmî vejîyenê û demokrasî azadîye wazenê semedê haştîye veng da. Nê wextî de vengdayîşo winayên zaf muhîm o. Bi na wesîle ez nê hêzan pîroz kena, selamanê xo înan rê şawena. Ganî nê xebatî bibê xurtêr.

Vera Rayber Apoyî tecrîdo giran dewam keno. Vera nê çalakîyî bêrê kerdene zî dewleta tirke ya îşxalkere sîyasetê xo de israr kena. Çunke têkoşînê ma yê vera tecrîdî biney zehîf o. Dewleta tirke zî nê ra cesaret gena. Hetê bînî ra tay dewletî semedê menfeatê xo paştî danê dewleta tirke. Dewleta tirke û îqtîdarê AKP-MHPyî zî nê ra feyde keno û sîyasetê xo rê israr keno. Têkoşînê ma resayo nuqtaya rijnayîşê îqtîdarê faşîstî. Dewleta tirke semedê domnayîşê îqtîdarê xo sîyasetê înkerkerdişî domnena.

Goreyê înan ne kurdî est ê ne zî meseleya kurdan. Kam ke vajo meseleya kurdan est a, ey sey 'sûcdar'î vînenî. Yanî zîhnîyetê dewleta tirke nêbedilîyayo. Goreyê nê zîhnîyetî meseleya kurdan bi şîdet û şerî yena çareserkerdene. No zîhnîyetê MHPyî yo. MHP partî nîyo, kontragerîla yo. MHP vano ganî PKK bêro qedînayene û qirkerdişê kurdan bêro temam kerdene. Rayber Apo, şarê kurdî û dostê înan vera nê sîyasetî xover danê, têkoşîn kenê.  Vera nê sîyasetî ma hemla daye destpêkerdene. Hemleya ke semedê azadîya Rayber Apoyî û çarserkerdişê meseleya kurdan dîyaye destpêkerdene rixmê kêmayîyanê xo netîceyê xurtî vetî meydan. Hemle ganî bi çalakîyanê cîya cîyayan bêro xurtkerdene.

Hem Rayber Apo, hem gerîlayê PKKyî û hem zî şarê kurdî sîyasetî serî zaf tesîr kenê.  Dewleta tirke tim propagandaya qedînayîşê PKKyî kena. La gama ke gerîlayan çalakîyê bitesîrî kerdî nê çalakîyan dewleta tirke û îqtîdarê AKP-MHPyî serûbin kerd. Propagandaya ke bi serran o kenê hem Tirkîya de hem zî warê mîyanneteweyî de betal bîye.  Her kesî dî ke na propaganda zûr a. Nê çalakîyan rîyo raşt yê dewleta tirke û îqtîdarê ci reyna mojna ra. Coka ê nêzanê se bikerê, nêzanê nê çalakîyan senî bêtesîr bikerê. Xeylêk kesî destbend kerdî, tepiştî, waranê gerîlayan danê bombayan ver, bitaybetî vera Rojawanî hêrişê giranî yenê kerdene.

Bi nê hêrişan kenê ke xo zehîfîya xo binimnê û xo hêzdar ramojnê. Ganî şarê Tirkîya îqîtdarî ra biperso, vajo 'Şima nê leşkeran şawenê ça, semedê kamî şawenê.' Ganî sebebê nê ser vinderê. Eke leşkerê tirkan mirenê, sebebê nê Erdogan o. Ganî her kes Erdogan û MHPyî ra hesab biperso. Wa şar vajo 'Şima qey domananê ma şawenê Vakurê Kurdîstanî, çi karê înan ûca est o? Eleqeya nê bi pawitişê sînorî û pawitişê bi şarê Tirkîya çîn o.  Seba ke şima waştişê xo bîyarê ca domananê ma şawenê şerî û mirnenê.' Berpirsîyarê mergê leşkeran Erdogan-Bahçelî yo.  Ganî şar nê bivîno. Sebebê krîzê ekonomî zî şer o ke îqtîdar rayra beno.

Artêşa tirke derba girde werde, hinî nêeşkena şerî rê dewam bikero. Nê çalakîyan no eşkera vet meydan. Seba ke serê nê bîgêrê şerê taybet-psîkolojîkî rayra benê. Çapemenî de raştîye nimnenê, şarî xapînenê. Nê wezanê şar sebebê ci bimûso û vajo hinî bes. Coka çîyanê bînan kenê rojdem. Bi na wesîle ez wazena veng bikerê qoricîyan zî. Wa xizmetê sîyasetê qirkerdişî mekerê, vera nê bivejîyê. Reyna wa pêşmergeyê PDKyî zî aletê sîyasetê qirkerdişî mebê.  Wa baregehanê dewleta tirke ra dûrî vinderê, paştî ci medê.

Ez gerîlayan rê zî spas kenê û înan pîroz kena. Wina eseno ke gerîlayî do nê têkoşînê xo bidomnê.  Wa dewleta tirke û îqtîdarê ci bizano ke nêeşkeno wina netîce bîgêro. Kurdî do têkoşînê demokrasî û azadîye bidomnê. Wa nê fam bikerê.  Sîyasetê qirkerdiş, înkar, îmha, tecrîd, îşkence, îşxalî caverdê. Eke cameverdê no do semedê Tirkîya tehlukeyeno girdan biafirno. Beno ke Erdogan weçînayîş qezenc kerd la Tirkîya ver bi rijnayîşî beno. Dostê Tirkîya  nêmendî, têna menda. Ganî şarê Tirkîya nê îqtîdarî ra hesab bipersê.

Sekê mi vat dewleta tirke polîtîkaya şerê taybetî yê psîkolojîkî rayra bena. Îqtîdar semedê sîyasetê qirkerdişî israr keno. Her kes zano ke çalakîyê ke ameyî kerdene eleqeya înan bi Rojawanî çîn a. La seba ke şarî bixapînê û hêrişanê vera Rojawanî bikerê meşrû vanê kesê ke nê çalakîyî kerdî Rojawanî ra ameyî, çekê ûca ra yenê. Heta vanê Amerîka ê perwerde kerdî, çeke dayî ci û şawitî çalakî. Vanê eke wina nêbo kurdî nêeşkenê nê wextî de wina çalakî bikerê. Çunku kurdan wirdi vînenê, sey komelî nêvînenê. Waştişê dewleta tirke û îqtîdarê ci oyo ke Rojawanî binate ra wedaro. Xora  nê eşkera vanê. Wazenê ke heme Rojawanî sey Efrîn, Serêkaniyê û Girê Sipî îşxal bikerê.

Vera nê hêrişan ganî şarê ma têkoşîn bikero. Ganî şarê ma xopawitişê xo xurtêr bikero. Rûsya, Amerîka û hêzê koalîsyonî vera nê hêrişan bêveng ê. Îmkanê cuye yê Rojawanî dîyenê bombayan ver, awe çîn a, ceyran çîn o, nêweşxane çîn o la vengê xo nêvejenê. Na bêvengîye yena manaya qebulkerdişê barbarîye. Yanî benê hemkarê dewleta tirke.  Şarê ma zî ganî vera nê bivejîyo.  Wa şar vajo, 'Şima tîya sekenê, şima sîyasetê dewleta tirke rayra benê ya semedê menfeatê xo tîya de yê? Şima şarê kurdî ser ra sîyaset kenê, kurdan kenê qûrbanê waştişanê xo, ma nê qebul nêkenê.' Erdogan DAÎŞî îdare keno û vera kurdan şuxulneno. Dewleta tirke xeylêk warî dayî bombayan ver la PDK vano sebebê hêrişanê dewleta tirke yê vera Rojawanî PKK yo. Yanî hêrişanê dewleta tirke keno meşrû. ENKS-PDK xîzmetê sîyasetê dewleta tirke keno. Ê çend vajê ê kurd ê zî eleqaya înan bi kurdîtîye çîn a.''