Rewşa weşîye ya xoverdayoxanê grevê vêşanîye yê Strasbourgî roje bi roje xirabêr bena. Çalakwanî bi qerardarîye xoverdayîşê xo dewam kenê. Endamê keyeyanê ke vînenê xoverdayoxî roje bi roje nêzdîyê mergî benê, seba serkewtişê xoverdayîşî cehd kenê.

Waya xoverdayox Mûstafa Sarikayayî Yuksel Şahîne ANF'yî rê qisey kerd û vat, xoverdayîş do qetî ser bikewo.

Seba ma rewşêka xeylî giran a

Şahîn a ke Belçîka de ciwîyena, qalê 5 menganê xoverdayoxan kerd: “Grevê vêşanîye bi baldarî teqîp kena, çunke no îrade do qetî ser bikewo. Labelê seba mi xeylî giran o ke kekê mi grevê vêşanîye de yo. Na rewşêka giran û bidej a. Ma zî eynî wext de teber de ey reyde grevê vêşanîye de yê. Nê dejî ra ancax keso ke dîyo fam keno.  Wextêko kêm nîyo, bi mengano dewam keno. Wexto ke hepisxane de bi xeylî reyan kewtibi grevê vêşanîye, la na reya xeylî bi derg.”

Ma hêvî kenê ke na çalakîye ser bikewa

Yuksel Şahîne vat,”Tekane babeta ke ma waya xo reyde qisey kenê na ya: Grevê vêşanîye de cagirewtişê kekê mi.” Şahîne ard ziwan ke, her çiqas seba têkoşînê naye qebul bikerê zî, seba ke waya ey ya û merdiş nêzdîyê ci yo, na înan rê giran yena û vat, “Bêguman hêvî û pawitişê ma o yo kena çalakîye ser bikewa, biqedîyo.”

Têkoşîn do qetî  ser bikewo

Yuksel Şahîne ard ziwan, sey her kesî a zî pêvînayîşo ke Rayberê Şarê Kurdî reyde ameyo kerdene ra hêvîdar bîya û vat, “Wextê ko ma heşna Rayberî reyde pêvînayîş ameyo kerdene, hêvîya mi bîye zêde. Mi va, tecrîd do biqedîyo û grevê vêşanîye bireso amancê xo. Labelê wexto ke metna destpêka serê pêvînayîşî ameye wendene, mi fam kerd ke tecrîdî û xoverdayîş do dewam bikero. Sey her kesî waştişê min o tew gird wedaritişê tecrîdî yo. No têkoşîn do qetî ser bikewo.”

Ganî dayîkî xoverdayîşê domananê xo ra wayîr bibejîyê

Şahîne vat, “Labelê teyna bi pêvînayîşêk, xoverdayîşê 6 mengan nêno qedênayene” û bale ante serê rolê dayîkan ê seba serkewtişê xoverdayîşî. Şahîne vat, “Dewleta Tirkî naye zana. Heta ke no tecrîd nêro wedaritene, grevê vêşanîye do nêqedîyenê. Ez zî sey kesa ke birayê ci grevê vêşanîye de yo, heta peynîye paştdayîş dana nê xoverdayîşî. Ez heme xoverdayoxê ke hepisxaneyan de yê silam kena. Labelê dayîkê girewteyan ganî xoverdayîşê domananê xo ra wayîr bibejîyê. Zaf muhîm o ke heme dayîkî no xoverdayîşo ke do qetî tecrîdî bişikno ra wayîr bivejîyê.”

Şahîne peynîya qiseykerdişê xo de zî vat, “Tîya ra vengdayîş bi welatanê Ewropa û sazgehanê wezîfedar kena. Bi taybetî ganî CPT bikewa dewrê û çimanê xo vera mergî nêgêro.”