Namzeta Mêrdînî ya Partîya Çep a Keske-Psîkologe Bêrîtane Guneş derheqê armanc û waştişanê xo yê wekîlîye de ANFyî rê qisey kerd.

Guneşa ke 28 serre ya, ard ziwan ke Partîya Çep a Keske bi 45 wekîlan Meclîs de temsîlîya cinîyan tewr zaf ana ca. Guneşe vat: ''Sere de têdûştîya temsîlîye, Meclîsî de ez do sey cinîyêka kurde vera pêro cîyakerîyan têkoşîn bikera.''

Guneşe vist vîrî ke Mêrdîn meymandarîya şar û bawerîyanê cîyayan keno û rixmê polîtîkayanê dewlete zî tewirê xo yê xoverdayoxî ra fek vera nêdano. Guneşe da zanayene ke erdlerzê 6ê sibate ra dima şaristanî rê koçêko pîl ameyo kerdene û a do xîret bikera ke şertanê mexdûranê erdlerzî hol bikera.

Guneşa ke endama Înîsîyatîfê Psîkologanê Mezopotamya ya, bale ante ser ke erdlerz de ame dîyene ke bi ziwanê dayîke desteko psîkolojîk zaf girîng o. Guneşe pare kerd ke kurdî sey komelêkî wayîrê travmayanê pîlan ê û vat: ''Travmayî wextêkî ra pey nasnameyanê ê şarî de cabenê. Travma polîtîk a. Coka serebûtanê travmatîkan de ganî xebatî bi ziwanê dayîke bêrê kerdene.''

Guneşe îfade kerd ke a dûştê pêro cîyakerîyan a. Guneşe vat: ''Xebata min a esase derheqê cîyakerîya etnîsîte û cînsîyetî de ya. Ez wazena Meclîs de binê sîwana Partîya Çep a Keske de ney ser o bixebita. Babeta min a verêne zî domanê mexdûrê erdlerzî yê. Ez do Meclîs de xebatanê serê nê domanan teqîb bikera.''