Paybext Berlin û bajaranê Hannover û Kielî yê Almanya de serrgêra 10.  ya Şorişê Rojawanî bi şîarê ''Bijî Şoreşa Rojava'' ameye pîrozkerdene.

Berlin de seba ke polîsan beyraqê YPG û YPJyî qedexe kerdî aktîvîte erey dest pêkerde. Aktîveteya ke bi rêzgirewtişê semedê şehîdan dest pê kerde de Fermandarê Pêroyî yê QSDyî Mazlûm Ebdî zî bi vîdeo konferans tewrê ci bi. Ebdîyî qala xoverdayîşê şorişî û vera çeteyan pawitşê Rojawanî kerd. Ebdîyî vat: ''Eke Tirkîya hêrişê Rojawanî bikero do pêro hêzê Sûrîye pîya cewabê ci bidê. Şarê ma yê Ewropa tim paştî daye ma, ma pê bawer ê ke ê do tim wayîrê şorişî vejîyê û ewro ra tepîya zî paştî bidê ma.''

Reyna qiseykerdoxanê bînan zî vera hêrişanê Tirkîya yê vera Rojawanî û bêvengîya nêrazîbîyayîş mojna û semedê wayîrvejîyayîşê Şorişê Rojawanî veng da. Hunermend Xelîl Xemgîn zî tede xeylêk hunermandanê kurdan zî bi deyîranê xo reng da aktîvîte.

Hannover de zî kurdîstanijan û dostanê înan Şorişê Rojawanî pîroz kerde. Şayî de mesajê Hemserekê PYDyî Salîh Muslîm û Fermandarê Pêroyî yê QSDyî Mazlûm Ebdîyî zî ameyî wendene. Qiseykerdişanê bi nameyê HDP û Die Linke de mesajê wayîr vejîyayîşê mîrasê şorişî dîyayî. Şayî bi deyîran û govende qedîyaye.

Kiel de bi eynî waştişî aktîvîteyêke ameye organîzekerdene. Bi seyan kesî tewrê şayî bîyî. Qiseykerdişan de ame vatene ke sey vizêrî ewro zî do kurdî dostê înan wayîrê Rojawanî bivejîyê. Şayî de deyîrê şorişî ameyî vatene û govende ameye girewtene.